小新朱古力流沙包　何B仔搶晒Fo！

食點心，流沙包、蝦餃、腸粉，聽到都覺得悶？錯喇！繼梳乎蛋、Little Twins Star、醜比頭後，點心店「点心代表」又搵到勁搞鬼嘅蠟筆小新加持，仲有一大班朋友好似正男、阿呆、妮妮，仲有屋企人媽媽、爸爸同小白都嚟齊晒，認真畀面呀！見到小新咁「動L」嘅動感屁股同咁「盞鬼」嘅大象何B仔，真係令人又面紅又想親親佢！

今次小新點心由即日起供應到2017年1月17日，包括7款點心、3款甜品同4款飲品，先望Menu已覺頂癮，設計到成本漫畫咁，點心系列係「搗蛋篇」，甜品同飲品就係「被打篇」，見到媽媽美冴發晒狂就知佢又飲酒亂性啦！不過至過癮都係流沙包，印有小新Sexy裸背同大象何B仔圖案嘅包包入面，係混有鹹蛋黃嘅瑞士朱古力流沙餡，小新話只要喺「適當」位置一篤一擠，感覺就會好「舒暢」喎！另外仲有冚住腸粉被唔願醒嘅懶瞓小新蝦餃、「流鼻水」嘅不理不理左衞門奶黃流沙包、震騰騰嘅小新屁股奶凍等等，咁多得意造型點心甜品，小新迷千祈唔好錯過呀！