世界第2好味蜜瓜包　香港有得食

終於等到喇！來自日本金澤市，在當地擁有50多間分店的「世界で2番目においしい焼きたてメロンパンアイス」12月3日正式登陸香港，想食就要早啲去銅鑼灣景隆街排隊。以為只有日本店名水蛇春咁長，原來香港店名「世界第2好味雪糕蜜瓜麵包香港店」一樣拗口，至於點解認第二唔認第一，親自來港監督的副社長解釋最好味的位置當然要留給教他做蜜瓜包的師傅，而超長店名並無簡稱，這樣反而令客人覺得極富挑戰性，努力記下他們的店名。店名不但開宗明義說明他們的出品是全世界第二好味，「焼きたてメロンパンアイス」則解作即時焗製的蜜瓜包加雪糕，意思清楚易明，要記其實唔難。

日本人出名認真，所以香港店的老闆Gavin也要過五關斬六將才可以將品牌帶到香港，除了食材與製法要跟足規定之外，Gavin亦曾到本店受訓一個月，加上開業初期副社長與當地同事亦會親自來港坐鎮，食到的滋味保證跟本店一模一樣。蜜瓜包同樣只得雲呢拿、朱古力與抹茶3種口味，外皮熱辣辣脆卜卜，牛油味特別香濃，夾着冰凍雪糕帶來冰火口感，果然好味道！提提大家食之前記得拎支飲管，因為雪糕溶化速度極快，有飲管在手自然冇咁狼狽。