本土妙筆　三一賣萌

我認，小編係偏心嘅，喺無數玩具之中，特別對本土品牌或設計情有獨鍾，最近嘅偏心之選，就係Ori Toy Q-Suit Series嘅《三一萬能俠》Getter 1。40年有多，「三一」玩具多如恒河沙數，再出仲有新意思？Ori Toy就向童年回憶取經，設計部揸Fit人阿毛解畫︰「細個時流行過一種玩具，有個駕駛員着番盔甲，變做機械人角色，今次就用咗呢個概念。除此之外，雖然三一萬能俠嘅商品有好多，但係連埋駕駛員嘅其實偏少，所以我哋用駕駛員做主打，以至電單車等冷門配件都做埋，其實流龍馬喺劇中經常揸電單車出場，我哋好希望藉今次商品，令玩家搵番當年睇動畫時嘅熱血感覺。」

採訪期間，小編亦有試玩，「裝着」設計真係頗有心機，裝拆都好容易，又唔會甩頭甩骨，喺呢方面，某啲日系大廠真係要好好反省。即使可動性唔係最大賣點，但係頭部與四肢都有基本嘅活動幅度，都擺到唔少甫士。實話實說，即使雕功與塗裝方面未至於雕像級水平，但係考慮到$400樓下嘅價位，加上Parts豐富、玩法多變，即使撇除「自己人撐自己人」呢個情感因素，都好值得支持。如果日後嘅同系作品，可以喺可動性方面再作調整，例如肩膊與髖位考慮加入延伸關節、主角Figure唔只一款表情頭像，咁就無敵了，屆時就算售價有相應調高，相信玩家都唔會介意。

做得玩具設計，阿毛本身都係一位動漫迷、玩具迷，尤其鍾意機械人，超級系與真實系都唔放過，不過咁多年嚟嘅玩具市場，嚟嚟去去都係萬能俠、高達、超時空要塞等經典主導，有力挑戰嘅新題材少之又少，原因何在？阿毛說︰「其實唔係冇新嘅動漫科幻作品接棒，而係商品化嘅模式變咗，新動漫嘅對應商品，好多已經由實體轉為電子化，例如Card Game或手遊，所以傳統嘅實體玩具市場，依然由要靠經典支撐，因為主要嘅消費群，即係我哋呢一代，細個時都未有手遊、App，我哋對實體玩具始終有較大嘅情意結。」話雖如此，不過無論大人或小朋友，總唔可以長時間活喺虛擬世界，只要設計有心思、造工有心機，小編堅信實體玩具仍然大有可為，否則每逢電玩節，粉絲就唔會爭住入場搶Game之餘又掃Figure，各大本地玩具品牌與單位，加油喔！

Facebook︰Ori Toy

產品查詢︰（852）9087 0011（ant toy）