電玩吹兩嘴：日系新作　1月打到埋身

踏入2017年第一個星期，諗吓有乜好Game推介畀大家呢？吓？要日系RPG？仲要戰爭Game？唔係嘛？唔識玩日文要中文版？唔緊要！呢隻肯定啱你心水！

將第三身射擊戰爭元素融入動作RPG玩法，SEGA《戰場女武神》系列最新作《蒼藍革命之女武神》，繁體中文版將於1月19日在PS4上市。遊戲講述小國日德蘭為抵抗羅斯帝國軍的壓制，由主角安姆雷斯率領反女武神部隊「破滅魔狼」，展開連場救國戰役。玩家需要指揮小隊深入敵陣，當和敵軍拉開距離時，操作介面跟一般射擊遊戲無異，一旦埋身攻擊就會進入RPG常見的實時戰鬥玩法。而今集更新增像魔法的「咒術」元素，而角色又加入「情緒」系統，令玩法更豐富。

介紹完新作之後，新年新開始，動作遊戲名作《God Eater》系列製作人富澤祐介就在Twitter拜年兼夾爆料咁話！講緊嘅係富澤祐介在Twitter轉載製作人吉村廣的遊戲角色祝賀圖之同時，發文暗示2月有關遊戲誕生7周年活動期間，有可能透露《God Eater》家用機最新作的情報，及後連官方Twitter都有轉載，睇嚟機會極高！其實去年9月東京遊戲展時，亦曾經釋出《God Eater Online》的製作消息，粉絲期待度同樣爆燈，相信下月的活動應該有眉目喇。

去年尾Steam平台的冬季特賣，大家有冇買咗咩心頭好？我雖然無錢買，但就有份投票選第一屆Steam大獎，剛剛星期二就公布了結果，竟然係佢拎走最多獎！？Steam官方網站公布了第一屆Steam大獎得主，12個獎項之中《GTA V》就獲得「這也太扯了啦！」和「遊戲中的遊戲」2個項目，果然開放式遊戲世界最受機迷追捧喇！另外難玩到爆嘅《Dark Soul III》就榮獲「又愛又恨」獎，人氣射擊《CS GO》就冠以「再五分鐘就好」稱號，真係實至名歸呀！

講住咁多先，下個星期同樣時間再同大家留意一周Game壇大事啦！收工！