雖然啲人成日話購物係女人與生俱來的天性，但老實說識買又唔代表你一定識襯，而識襯也未必一定買得起，所以假使呢一刻問你「究竟咩年紀嘅女人平均着得最潮？」想來大家都會口啞啞咁答我唔到，不過向來鍾意尋根究柢的英國人，最近終於為大家找出答案。

英國保險集團RSA最近就以相關題材進行具規模研究，最後發現原來30歲左右的女人是最潮最「Most Stylish」的，調查指出女人在30歲的收入水平、自我認知度、對時尚潮流的洞悉力等各項指數的平均值都是最高，搵錢能力愈來愈高之際，容貌身材亦還未開始走樣，又買得起、又襯得起，的確是人生最快樂的時光！

調查亦具體指出30歲左右女性其具體的消費狀況，首先她們每人平均會有212件服裝產品、24件首飾以及7對名牌設計師出品的鞋款，誇唔誇張與否就真係見仁見智，而她們對時裝服飾的總支出則平均為US$11,000，即HK$85,000左右，當中大約三分一即HK$23,000乃是花費在鞋類產品之上，足證女人果然最喜歡買鞋！

而調查也指男人平均着得最潮的年齡為36歲，足足比女人遲上6年有多，間接引證了男人果然是一種遲開竅的動物。