紅色iPhone 7開箱！「利是紅」夠搶眼

「紅色的跑車像是帶着神秘……」而紅色的iPhone 7同iPhone 7 Plus亦一樣神秘感十足，突然發布又突然開賣，搞到大家都心思思想一窺盧山真面目。這方面香港Apple好細心，特別安排傳媒提早拍攝真機，又等小記睇吓佢有幾「紅」先！

先講Packing，一如其他顏色（除了亮黑）般，iPhone7及7 Plus（PRODUCT）RED也採用了白色包裝盒，封面印有紅色機背圖案，側面的iPhone及Apple商標則齊齊換上紅色，同時盒底印有（PRODUCT）RED字樣，辨識度好高，一定唔會買錯！

咁真機又點呢？初頭以為紅色機身一定娘味十足，殊不知外觀比想像中漂亮。首先整個機背連機側都添上鮮紅色，表面帶少許磨沙感覺，看上去有點像利是封的紅，但燈光下又有金屬感，望落舒服大方而未見刺眼，相當討好。招牌Apple Logo這裏用上銀色，反光依然，同紅色機背襯到絕！美中不足的是機面只有白色選擇，Home鍵則用上銀色邊框，整體似曾相識，若廠方再大膽些改用黑色機面，對比度更大，「紅黑紅紅紅黑」一定更加有型！

一如盒底，紅色iPhone 7/7Plus的機背也印有（PRODUCT）RED字樣，同時「額頭」及「下巴」兩條膠邊也一併變成啞紅色，加上SIM卡槽也鍍上紅色，紅得徹底！當然新色也非毫無缺點，例如摸上手都幾滑手，而且背部容易沾上指模及面油，愛清潔人士要勤加抹拭了。

睇埋配件，有齊Lightning線、火牛、耳機、說明書及商標貼紙，全部無改色無改款，驚喜不大。特別位反而是內附一張紅色聲明，指（PRODUCT）RED系列產品將把部分款項損予Global Fund，並應用在全球對抗愛滋病工作上，提醒大家買機之餘做咗善事，一舉兩得。

（PRODUCT）RED版本的iPhone 7及iPhone 7 Plus備有128GB及256GB兩個容量，已在Apple官網接受預訂，傳聞內地供不應求，果迷記得搶了！