電‧競女掃場：撐土炮《芒亨》攻略

又到月尾，縱觀Game店各平台遊戲、主機的銷情個別發展。真心一句，連電‧競女本周信和行場，都搵唔到乜嘢特別主題可以介紹畀大家。其實整個3月主機嘅討論焦點都離唔開任記Switch身上，事關「密月期」仲係大把勁作預訂，搞到《芒亨》冇晒話題，難怪有玩家直言等遊戲「轉會」到其他平台先炒番起個勢。

土炮《芒亨》攻略要撐！

上周同大家講過有關N3DS《Monster Hunter XXX》的情報，其實呢個星期價位保持平穩，上落大約三魚二草至三魚七草左右，始終作品有一定知名度，如非意外店舖唔會隨意冧價嘅。講番信和閣樓大舖都有賣《芒亨》，不過就Sell埋土炮香港遊戲編輯所撰寫嘅攻略，全128頁教晒大家狩獵技巧、魔物分布等，一本五草有找散，相當有誠意。如果遊戲連攻略一齊買，就盛惠三魚七草有找。其實香港地近年經已好少有心人肯出攻略本，事關有乜唔明統統Google，所以呢啲「血汗讀物」，你無理由唔撐啩！

NS孖寶賽車有得訂

講到任記Switch都係信和地庫大舖貨源最足，主機、周邊乜都有齊，賣價依舊係二牛八魚找一，日版就平一百，兩者相差只係「行貨保用」一項。不過下個月尾有款《Super Mario Kart 8 Deluxe》發售，好多機迷都會趁呢段時間出機。講番遊戲，地庫大舖同1樓都有日版預訂服務，開價要四魚三草左右，日圓升咗所以符合預期，至於套落Joy-Con嘅軚盤個人建議有需要先買喇。

平入雜牌Switch直立架

問番好多老友，現時Switch周邊最實用係直立架，事關主機勁食電，如果桌上模式下無法為主機邊充邊玩，所以要靠安插在直立架令主機下方懸空，先可以篤到線叉電。可惜大牌子直立架都要賣近百元，唔係咁值，好在最近閣樓大舖入咗款雜牌Switch直立架，只係賣七草找二，相當抵Deal。

PS4翻兜雅達利

差唔多一年前巡場男曾經介紹過Atari Flashback復古遊戲機，估唔到品牌亦於PS4推出兩款合輯遊戲碟《Atari Flashback Classics》Vol.1及Vol.2，各收錄50款經典作，骨灰級例如《Pong》（乓）、《Super Breakout》（打磚塊）、《Centipede》（蜈蚣）等等，全部忠實重現當時畫面。兩隻遊戲碟最平各售一魚六草有找，想尋找回憶呢個都不失為一個唔錯嘅方法。