電.競女掃場 Switch日版又返貨

20170407
東網電視
更多新聞短片
電.競女掃場 Switch日版又返貨
仍然係任記Switch話題,下周復活節長假,近日唔少朋友落旺角信和、好景都係搵Switch嚟買,之前地庫大舖存貨賣得七七八八,最後一水行貨更炒賣至三金牛找一蚊高位,好在閣樓大舖最近入咗批日版水貨,價位仲好吸引吓!
Switch日版彩、灰機同價
今次閣樓大舖嘅日版Switch售價認真唔話得,二牛七魚就可以任揀紅藍Joy-Con或者全灰機版本,仲要送一套雜牌Starter Kit,有齊機套、保護貼等,呢個價錢的確唔錯。其實有老友講起有大型連鎖電器店早前行貨Switch收訂,情況亦係極速截訂,不過意味住即將又有一批行大貨抵港,如果連些少炒價都真係唔想畀,亦唔急住玩的話,繼續等吧。
NS版《LEGO City Undercover》登場
買完Switch梗係掃埋Game啦,早前官方已宣布NS版《LEGO City Undercover》中/英文版於4月5日上架,不過現場所見大舖多數都係賣美版,價位比行貨平HK$18,只係三魚八草,LEGO粉絲可以諗諗。今集玩家要扮演臥底警察去追捕逃犯Rex Fury,在LEGO大城市中超過20個地區自由穿梭調查,當中仲可以觸發各式小遊戲和副任務,玩法輕鬆惹笑。
入門級Hori RWA 九百有找
上周傳出美國著名遊戲周邊品牌Mad Catz執笠,搞到一眾玩家難過。其實市面上冇得用進階級的Mad Catz,還可以買入門級日本Hori,當中如街機格鬥大掣、賽車Game方向盤唔駛一千有交易。例如閣樓大舖有款Hori RWA Racing Wheel Apex GT賽車盤,僅售九魚找一。產品去年年尾登場,對應PS3、PS4及PC平台,提供不俗的仿真駕駛體驗,軚盤具270度Turn Ratio,又可以自訂操作按鍵,相當經濟實惠。
《無雙☆群星大會串》特典版值儲
3月尾上架的《無雙☆群星大會串》雲集光榮旗下遊戲角色,除了《真‧三國無雙》和《戰國無雙》外,子公司Gust的RPG《鍊金術士》系列、旗下AVG經典《遙遠時空》、Tecmo格鬥作品《Dead or Alive》、動作潛行《忍者外傳》等收錄其中,就連最新《仁王》異國劍士威廉也參戰!今次遊戲碟PS4行、日兩個版本均賣五牛找一,但個人就推薦Treasure Box特典版,地庫大舖有售,九牛找一包含精美設定集、月曆、Soundtrack和入浴海報,當中設定畫集收錄不少珍貴角色插圖,極具收藏價值呢。