雖然美國流行音樂天王Michael Jackson逝世已經將近8年，但他昔日於舞台上的風采至今仍然對音樂界以至時裝界擁有舉足輕重的影響力。當中於1982年推出的第6張專輯《Thriller》入面所收錄的《Billie Jean》、《Beat It》及《Thriller》3首歌曲，更是他音樂里程的首個高峰，3首歌的MV無論拍攝手法以至服裝造型都相當經典，當中後兩者所帶起的紅色皮褸熱潮更不時會於時裝界翻生大熱。今次美國街牌Supreme就繼續以「估你唔到」的姿態，選擇向呢位一代樂壇巨星致敬，推出Supreme x Michael Jackson聯名系列。

坦白講，以Supreme現時人氣嚟講，其實同一個七線歌手聯名大家都一樣會搶，但今次呢個龍頭街牌就選擇同全球擁有無數樂迷的已故樂壇天王Michael Jackson合作，反應熱烈絕對是預料之內。設計就以《Billie Jean》MV內的紅煲呔襯禮服造型作主打，並分別運用到Sweatshirt、Tee、S/S Work Shirt及Skateboard 4款單品之上，呢啲「至尊x天王」咁可一不可再嘅聯名合作，就算閣下唔係Michael Jackson樂迷或者Supreme Fans都真係要入手當留個紀念。同步上架的Perforated Camp Cap及Race Camp Cap就分別採用打孔及網布設計，完全對應潮人夏季需要，加埋最易襯的黑白灰色調，襯埋落呢個聯名系列都絕無違和感。