街市學堂：咩係鹽滷豆腐？專家話你知

天氣又熱又焗，豆腐清新又有豆香，最啱夏天作菜入饌。原來豆腐都有兩種不同的製作方法，一種是鹽滷一種是石膏溝成。兩種豆腐到底有咩唔同？鹽滷豆腐又係點整嘅呢？原來兩種豆腐有好大分別！不如就等荃灣街市一間做手工豆腐逾60年的豆腐舖負責人陳太為大家解答喇。陳太表示，鹽滷豆腐要師傅去做，要識睇滷唔滷得成先得。石膏豆腐就唔需要，用石膏沖就凝固，但石膏豆腐就容易變酸。

聽陳太講，鹽滷豆腐是傳統手工製品。鹽滷是海水製鹽的副製品，呈半透明結晶狀，溝水成做豆腐的鹽水。做法是將新鮮即磨的黃豆磨成豆漿，用大鑊隔水座滾至少10分鐘至到煲出豆香，再由師傅以人手逐少逐少加入鹽滷攪拌成蛋花狀，即是較為稠身的豆漿，再用石壓成豆腐，除講求師傅手藝，所需時間亦比石膏粉溝成豆漿的時間要長。此外，兩種豆腐在味道上、耐煮程度及外形等都好唔同㗎。首先講味道，由於鹽滷豆腐是由百分百豆漿壓製而成，豆味分外濃郁兼具香滑。加上是用天然鹽滷成蛋花狀再壓成豆腐，因此耐熱耐煮，不易散爛。至於外形就不及石膏粉溝成的豆腐咁高身，會比較扁平，但就更有彈性。鹽滷豆腐除了可以煎炒燜煮滾湯外，亦可以分別炸成豆卜及炸豆腐，口感更加鮮香富豆味。簡單來講，識食梗係食鹽滷豆腐啦！