十周年大作　盤點5大iPhone 8傳聞

十年前的今日係iPhone推出的日子，當時對全球科技界簡直係震憾消息，甚至可以話係改變世界的劃時代產品。今年就係iPhone十周年，相信新一代iPhone 8肯定有各位意想不到的設計或新功能。而新機傳聞自上年已經謠言滿天，就等小記為大家盤點，孰真孰假，等多幾個月就揭盅啦！

1. 窄邊框大芒

歷代iPhone的屏幕佔機面比例都相對低，相反新一代Android機例如Samsung Galaxy S8、LG G6o既屏幕幾乎用盡機面面積，近期傳出相片就顯示iPhone 8亦都會改用呢款窄邊框大芒設計，屏幕幾乎貼近邊框，屏幕尺寸有機會由原來的4.7吋增大至5.8吋。而流出的iPhone 8體積為143.59 x 70.94 x 7.57mm，尺寸只係介乎iPhone 7及iPhone 7 Plus，改用大芒下似乎唔會太影響單手持機的便利性。

2. 取消Home鍵

與上一段傳聞有連繫，iPhone 8的設計圖顯示，新機將棄用歷代iPhone沿用的Home鍵，5.8吋屏幕上僅5.15吋位置為實際範圍，其餘位置就為「Function area」，大有機會是取代Home鍵及指紋識別器，甚至如新版MBP的「Touch Bar」按不同程式而切換圖示，功能自然更多變。

3. 加入無線充電

無線充電功能已經推出一段時間，但支援的手機、配件卻十隻手指數得出，嚟緊可能由iPhone 8扭轉局勢。根據外界猜測，經過兩代Apple Watch的無線充電試驗後，iPhone 8極有可能兼容無線充電技術。另一有力線索就係Apple今年正式加入無線充電聯盟（Wireless Power Consortium、WPC），成為會內213名會員之一，而WPC正正不斷推廣Qi無線充電制式，咁Apple新產品支援無線充電絕不為奇！

4. 新配件變Laptop

Apple一直都好積極申論設計專利，根據專利圖就有機會搵到新機設計方向。當中一個專利就係將傳統Laptop的TouchPad位置淘空，並可以插入一部iPhone，估計就可以將手機瞬即變成Laptop模式，而iPhone亦可以變成觸控板，觸感、反應肯定比傳統電腦好得多。如果手機、Laptop模式切換過程做得流暢、爽快的話，絕對可以秒殺市場上大部分輕巧型Laptop，又的確令人期待！

5. 9月發布

自從iPhone 5開始，新iPhone發布會一律9月舉行，照推論iPhone 8將會於大概2個月多月後現身，而呢個說法亦有印證。皆因早前流出相信是Apple內部的通告，指公司將9月17至11月4日定為Black Out Days，公司產品將會有極大需求，Advisors、Leaders都禁止放假。究竟邊樣產品會令到全民瘋搶？答案呼之欲出啦！