貪食蛇重生！神機Nokia 3310極速開箱

曾經風靡萬千機迷，叫人勾起集體回憶的平民機王Nokia 3310，自傳出會復刻重推後，叫不少Fans期待萬分。正當大家苦苦等候行貨推出，內地版3310（2017）已經靜悄悄進駐先達，記者立刻借來為大家極速開箱，看看這部昔日機王依家變成點！

Nokia 3310（2017）外形上跟舊版有幾分相似，都是番梘造型，上方設屏幕，下方則是實體Numpad；只不過新版就更纖薄輕巧，體積只有115.6 x 51 x 12.8mm，手持感更佳；而且2.4吋屏幕變成QVGA解像度兼彩色顯示，視覺上當然漂亮得多！啓動手機，叫人熟悉的專屬開機鈴聲隨即響起，老機迷應該好感動，只不過操作仍然依賴中央的十字按鍵，冇得篤芒，現在重用要時間適應。

系統用的是Nokia Series 30+，呈現四方格仔介面，並附有中文註解，不難識認。功能則備有FM收音機及MP3播放器，亦設有200萬像素鏡頭及閃光燈，影相時一如時下手機有不同濾鏡選擇，叫跟得上時代進步，當然相片質素就不要期待太高了！玩得3310，必玩經典《貪食蛇》，新版本叫《Snake》，條蛇終於有眼，蘋果更立體，玩法維持不變，要用4及6數字鍵來控制左右避開撞牆，依舊好玩小心上癮！

數到配件，隨盒附有火牛、microUSB充電線及3.5mm耳機，由於是內地版關係，所以火牛是兩腳的，要充電就要搵轉插。電池採可拆式設計，電量有1,200mAh，充一次夠講22.1個小時，延續Nokia耐用作風。水貨返齊了黃、灰、藍色，開價一千蚊有找，據水貨商指暫時銷量極佳，但他亦提醒兩點，一是此機只支持2G，而且冇Wi-Fi；二是要小心買到假貨，事關內地已有翻版出現！