炎夏急凍！手提Gadgets鬥消暑

夏天為大地帶來美腿，但欣賞同時，也要做足散熱工夫，否則天氣又熱又濕，好易中暑！今時今日散熱Gadgets有好多種，除人氣芭蕉扇外，市場還有不少另類選擇。今次一於幫大家搜羅回來，齊齋驅走悶熱啦！

J-Cube 二代冰火棒（冰感值︰＊＊＊＊）

先介紹由日本而來，由J-Cube推出第二代冰火棒。全機不設扇葉，橢圓形金屬面能極速製冷，啟動後10秒左右溫度即急降至5度，熱的時候放在面部或頸背便能迅速Feel到透心涼，Model都話比風扇涼好多。新一代主要追加了高頻震動功能，以每秒震動300次來達到按摩效果，消暑同時紓緩疲勞！它備有粉紅及黑色選擇，連襯衫都照顧埋！

Evapolar微型冷氣機（冰感值︰＊＊＊＊＊）

若嫌冰火棒未夠凍，更誇張的有微形冷氣機Evapolar！它的長闊高俱為170mm，正正方方既可座枱擺放，又可放在背囊帶出街使用。它的機頂設有圓形轉盤，輕輕一轉便能調校溫度及各式設定，最高製冷能力達1,200 BTU/h，約為1/6匹，能在5平方公尺範圍內將溫度降至17度；而且只要注入清水，就能達到保濕及空氣淨化作用。留意它的機身設有microUSB插口，可經火牛或尿袋驅動，室內室外都啱用！

相機形風扇（冰感值︰＊＊）

《國產凌凌漆》中星爺將風筒藏於皮鞋之中，外形同功能「九唔搭八」，以下這部風扇一樣藏於民間之中。表面上它是一部相機，實際上它是一個風扇。尺寸83mm x 60mm x 52mm的它，大約只有半隻手掌大小，機身有仿鏡頭、快門及閃燈熱靴位，連按鍵布局也做到似模似樣。但只要把前方鏡頭拆走，就會見到兩片扇葉，一按快門掣便送出涼風，而且風力強勁，絕非得個樣！它以2枚AAA電池驅動，電池位藏於「假屏幕」背後，設計別具心思！

Sanrio雪糕球風扇（冰感值︰＊＊）

夏日炎炎最好食雪糕，這款Sanrio掛頸雪糕球風扇雖然「不溶喺口」，但見到一樣涼浸浸！事關拆開雪糕球再放入2枚AAA電池，再按動電源掣便能推動兩塊扇葉轉動，帶來涼風。它有5款造型選擇，包括Hello Kitty、My Melody、布丁狗、蛋黃哥及玉桂狗，全是Sanrio人氣角色，夏天帶出街夠搶眼。

魚竿手絞風扇（冰感值︰＊＊）

魚竿大家就見得多，但魚竿形風扇又見過未呢？這款手絞風扇毋須用電，只要一路攪動風扇旁手柄，扇葉便會不斷轉動，而且風力比想像中大，畀大家邊解熱邊運動減肥。風扇有多啦A夢及Hello Kitty兩款卡通造型，至啱小朋友！

共田芭蕉扇F9（冰感值︰＊＊＊）

睇完以上新式清涼Gadgets，是時候睇番傳統手提式風扇，只不過它們也與時並進，加入了變形元素，例如共田芭蕉扇今年就追加了新型號F9，在風罩下方加設手柄，不但外形更似古裝芭蕉扇，手柄更可以向後翻起，方便夾於衫褲，又或座枱使用。最小風力下它夠用8小時，足夠大半天使用。

Momax iFan（冰感值︰＊＊＊）

齋睇樣，Momax iFan同一般風扇無甚分別，備有藍、黃、黑三色，設有4片扇葉提供4W輸出，風力不俗。其最大特色是二段變身，既可拆走手柄當作便攜風扇，駁長後又能座枱擺放，而且手柄支援180度轉動或120度前後調校角度，配合下方吸盤，可吸實於餐桌、牆壁等平滑表面，方便從不同角度送風。特別一提，它的機身設有USB輸出，可替手機充電，設計周到。