開箱男：孖住爆咪　途訊Q7S Duet雙人對唱版

【特約報道】國產途訊咪高峰憑着歌后容祖兒的試咪片而一唱成名，可惜單人獨唱難免無咁盡興，開箱男唔想「從不喜歡孤單一個，可惜偏偏孤獨一個」，聽講早前途訊和漢科電腦合作推出「Q7S Duet雙人對唱版」，只要將兩支咪同步，再經藍牙連接流動裝置，即可進行對唱，當然你想一個人獨唱亦冇問題。咁巴閉，開箱男當然要試試佢啦！

今次途訊和漢科首次聯手推出行貨Q7S Duet對唱咪，難怪包裝盒面會直接印埋漢科Logo，打開綠色外盒，可見兩支玫瑰金色咪高峰、一份中英文使用指南、兩條USB充電線和一條連接Micro USB的3.5mm錄音線。外觀上新作Q7S Duet延續其華麗浮誇設計風格，鋁金屬咪柄配上搶眼玫瑰金配色，白色仿搪瓷咪身一邊備有電源開關和音量、伴奏、高低音及Echo調校推鍵，兩側面板設有喇叭。另外，咪高峰有3層過濾網頭，兼具抗噪功能，令演唱時音色更順滑，原音更突出。對唱咪採用電容式拾音器，頻率範圍100Hz至10KHz，最大聲壓可達115dB，又內置SDX級混音晶片，大幅提升聲音質量。此外底部備有micro USB充電端子和 3.5mm耳機插口，叉爆電可以玩足6-7小時，相當耐用。

接駁方面亦非常簡單，先要同時按下兩支咪的電源鍵進行同步，直至有提示音即可，然後透過藍牙連接手機，揀選Tosing-02D進行配對。Q7S Duet對唱咪支援市面上大部分唱K App，今次開箱男就使用《歡歌KTV》進行測試，點播曲目後歌曲便會於兩支咪同時播放，唔講咁多！即刻搵靚女同事Show Time！

查詢： 3626 9899