跟住學　5招即整傳統柚皮

中秋節好快就到，除了傳統過節食品外，還有時令沙田柚做的柚皮亦是應節意頭菜，入口清新芳香，吸收了醬汁的鮮味，好味之餘亦象徵一家團圓。不過，做柚皮工序繁複，已經是近乎失傳的手工菜。今日請來沙田一間酒店的中菜主廚何振雄師傅，教大家5招自製柚皮，不妨邊學邊做。

第1招:先要揀啱碌柚。除廣西沙田柚外，泰國的金柚質感細緻，亦是做柚皮的上乘材料。首先在柚皮面鎅個十字，用手剝開柚皮後要將柚肉保留，用刨刮去柚皮青色部分，去除柚皮苦澀味道。

第2招:將刨青後的柚皮修剪成圓形，放入室溫水中浸約3小時，用力榨去柚皮水分，然後換水再浸20分鐘後榨水，重覆換水、浸20分鐘再榨乾水大約6次，直至柚皮完全沒有澀味。

第3招:將瀝乾水的柚皮，放入攝氏160度油溫的油鑊中炸約3分鐘，其間不停用鑊鏟翻動柚皮，令柚皮均勻受熱之餘，亦不易炸燶。

第4招:炸好的柚皮會變得乾身及硬實，為了令柚皮在煲煮過程中不易散爛及保持圓碌碌的應節造型，要將炸好的柚皮用2塊竹達（竹製蒸網墊）夾着，然後用木筷子將柚皮固定。

第5招:準備大湯鍋，先放入洗淨的瑤柱、蝦米、豬油及預先煎香兩邊的新鮮鯪魚，最後加上用竹達固定好的柚皮，注水至蓋過柚皮面，然後用重身、反轉了的大碟壓着竹達，用慢火煲約3.5小時，就可以用來炮製不同菜式啦!