輕輕鬆鬆鹿頸遊

話咁快又到「秋分」，近排已不見上月嘅攝氏34、34度高溫，天氣漸涼，意味行山季節又來喇！如果假日想同家人去郊外輕鬆走走，又唔想去熱門山徑同人逼餐懵，不如考慮下今次介紹嘅鹿頸短遊，沿途多樹蔭、上落不多，短短幾公里路程，三、兩小時就可完成。起點位置又有露天茶座及停車場，行完唔夠喉仲可到旁邊的釣魚場一試身手，輕輕鬆鬆就一個周末。

今次揀嘅路線喺鹿頸起步，如果從九龍揸車去，沿汀角路、新娘潭路直行到尾就是目的地，公眾停車場有十數個免費入錶車位，咁就唔使擔心行超時被抄牌啦！連同折返停車場的一段路，全程步行距離只有8km，計埋影相、休息時間，一般人都可在三小時內完成。如果唔揸車，可選擇搭乘56K號專線小巴前往鹿頸起步，落山後可直接在烏蛟騰乘車離開，路程進一步縮短至5.5km，行山初哥都不難應付。起步點在鹿頸路及新娘潭路的交界位，該處設有露天茶座及公廁，郊遊人士可喺度醫飽肚、補給糧水及辦理「大小二事」後才出發。跟隨鹿頸村指示牌入村便開始行程，通過村落時記得減低聲浪，亦要多注意路面，村內不時有狗狗在路中睡覺，小心不要踩到佢哋。

此路線會經過一些村路，部分路段又會與橫七古道及衞奕信徑十段重疊，主要分岔位都設有指示牌，不易迷路。經鹿頸路入村後，直行至「T」字路口右轉便會見到鹿頸（黃屋）公廁，在這處起沿主路走，經過七木橋，再跟隨烏蛟騰指示牌前行便可返到新娘潭路。途中可略為離開主徑參觀尤德亭並稍作休息，該處可俯瞰鹿頸及沙頭角一帶，眼前畫面不是連綿山脈，就是破舊的村落及平靜漁塘，猶如一幅大師筆下的山水畫。近年，香港不少山徑都被石屎化，天然道路被石屎破壞，對於喜愛大自然的山友而言，除了傷感外，還剩甚麼呢？是次路線平時不算太多人行，而且甚少由石磚、混凝土等物料鋪設的人工路，部分雜草更長及腰高，感覺很天然。即使如此，路徑還是頗清晰，在叢林中行走也不易失方向，加上路程短，不用多大氣力便可體驗真‧大自然，多好。

新界東北有好多山行，部分仲頗有挑戰性，如上八仙嶺、吊燈籠等都有一定難度，相當花體力，炎夏日子更不宜攀登。若行完上述5.5km山路後想加程、又不想攀高山嘅話，可考慮沿新娘潭路折返鹿頸途中，右轉上鳳坑家樂徑，位於高點的觀景台不但可望到谷埔、雞谷樹下及鳳坑等村落，天氣好的日子還可見到深圳。跟隨家樂徑走至終點，再沿海邊的吊燈籠徑返回停車場，行程總長度會加至9.5km左右。回程途中，沙頭角海邊會見到許多細小的紅樹林群落，還有廣闊的泥灘，不時都會見到小白鷺，喜歡觀鳥或「打雀」的拍友應會有豐富收穫。不過要注意此地區的底層鬆軟，建議不要走向離岸太遠的泥灘，免生危險。想到紅樹林賞蟹，理想的時間為退潮期間，於夏季的清晨或黃昏更理想，但只宜遠觀，切勿帶走任何動植物，保護自然生態，每個人都有責任嘛！