抵玩全天候拍4K　SJCAM SJ7 Star

家陣部部機都標榜4K拍片，就連俗稱Action Cam的運動攝錄機都唔例外，而且門檻仲愈來愈低，就好似ZETA科卓最近引入的SJCAM SJ7 Star，不但支援4K@30fps原生影片，亦都提供1,080@120fps質素，畀你大玩慢鏡播放，再加上支援陀螺儀防震技術（適用1,080@60fps以下畫質），可確保拍片穩定性，即使邊行邊拍都冇大幅搖晃，重播時就唔會Chok到頭暈！

備有黑、銀、玫瑰金三色的SJ7 Star，不僅採用耐用又硬淨的鋁金屬機身，而且跟機亦附有支援30米防水外殼，陪住你上山下海。SJ7 Star的設計簡約，而且相當易用，加上背面採用2吋觸控式，揀選擇設定或切換模式，操作反應都相當靈敏，至於鏡頭提供三種視角選擇，當中包括70度、120度和166度，畀你因應唔同主題拍攝，輕鬆做到第一身拍攝、影人、影景，加上內建車載模式，甚至能夠化身成為車Cam記錄路況。此外，SJ7 Star可透過Wi-Fi功能，配對《sjcam zone》手機App進行實時預覽、遙距操作和播片，整體功能和規格都拍得住主流Action Cam。