Xpower CON1　防水「樂」動

唔少用家都鍾意一邊聽歌、一邊跑步或做Gym，不過大汗疊細汗隨時令耳機入水而報銷！本地配件品牌Xpower最近就推出藍牙耳機CON1，採用一體式線材設計，耳塞位置更加入磁石，唔聽歌時亦可以掛頸唔怕左揈右揈。為方便運動一族，CON1更支援IPX7防水防塵標準，可於1米水深正常使用30分鐘，汗水、雨水當然無懼啦！另外，耳機設有3按鍵線控，可以控制播放、暫停、跳播、音量、接聽或拒絕來電等，操作直接。耳機對應藍牙4.1技術，同時兼容aptX編碼，令音質於無線傳輸仍然保持水準。至於電量，充滿電後可以提供長達8小時音樂播放，續航力唔錯。順帶一提，包裝附送3款不同尺寸的耳膠及1款耳棉，照顧唔同耳形的用家，夠貼心。