順Phone快遞：良率超低　iPhone X或延遲出貨

iPhone 8/8 Plus銷情一般，最近更有傳電池自動爆開，果迷遂將注意力轉到iPhone X身上。iPhone X原預計10月27日預售，11月3日正式推出，但有消息指Apple可能因為良率太低問題，而將出貨期延遲至12月！據稱，iPhone X主要出事位在於OLED屏幕及前置3D感測器上，後者用於偵測臉部及支援Face ID，是今代主要賣點，但如今卻因為技術問題而令手機生產良率跌至不足10%，因而影響首批100萬部的出貨時間。分析師估計，iPhone X全球預購量達到5,000萬部，如今供不應求情況有機會持續至2018年中，本年度買到iPhone X將難過登天，成功搶購的果農一定獲利豐厚呢！

機王攝力比較 獎門人：「打和！」

所謂「既生瑜，何生亮」，Note 8及iPhone 8 Plus兩部機王差唔多同時間發布，又同樣擁有雙鏡頭，難免處處畀人比較。最新權威評測網站DxO Mark就做了個攝力測試，結果兩機同得94總分，一如獎門人口頭禪：「打和啦！」在細分上，Note 8在影相一欄得到100分，DxO Mark特別稱讚它的遠攝能力，指即使在8倍數碼變焦下，它的影像仍然保持清晰；相反iPhone 8 Plus就有明顯雜訊及色差問題。

DxOMark又指Note 8的散景效果較佳，背景虛化明顯；但拍片卻因為動態範圍有所限制，又要不時手動追焦，所以得分只有84分，不如iPhone 8 Plus的89分。兩機同分，Fans咪開心住，因為佢哋都唔係最高，目前最高分是剛獲得98分的Pixel 2，真係高處未算高！

兩萬人仔！Samsung土豪摺機下月推出

Samsung好鍾意係大陸出摺機，而且唔貴唔出，看中的正是內地的土豪市場。最近Samsung便再與中國電信合作，將於11月獨家發售雙屏幕旗艦摺機SM-W2018，估計定價高達兩萬元人民幣，比售價高昂的iPhone X仲要貴成倍！據悉SM-W2018將設有兩組4.2吋1,080p高清屏幕，搭配Snapdragon 821處理器、4GB RAM及64GB ROM，前置及後置鏡頭分別達到500像素及1,200萬像素，並配以2,300mAh電池。整體規格唔算吸引，但玩得此系列向來唔係追求性價比，而係翻開手機那刻獨一無二的快感！