男友拒絕洗碗︰「我無要求佢煮飯㗎喎!」
前幾篇我講過,有丈夫因為太太不煮飯而想到離婚,今次的主角則剛剛相反,竟然是因為同居女友煮飯,他覺得好煩好討厭而想到︰「不如匿返阿媽度住。」
起初我都以為自己聽錯,但看到他一臉厭煩的表情,我只好相信。
「佢(同居女友)大條道理話,我煮你洗喎!喂,啲碗邊個用就邊個洗啦!」他邊抖腳邊投訴,個相的確好福薄。
「但你有份吃嘛!」我忍不住幫個女的。
「嗱,佢就係咁講!喂,我無要求佢煮飯㗎喎,我唔介意食飯盒囉!唔好煮果陣就好偉大咁為我好,到要洗碗就講公平!」
過了幾天,輪到同居女友來見我,不用猜,她當然是好委屈︰「我都係為佢好啫!」
有句說話叫「莫教人分妻」,所以我作為旁人,亦不想太三姑六婆地講那些「這樣的男人不要也罷啦!」於是我想了想,只好說︰「既然你知道他好憎洗碗,有想過其他解決方法嗎?」
「例如呢?」她紅着眼睛問我。
我︰「請鐘點?」
她︰「花埋啲咁嘅錢⋯⋯」
我︰「用環保即棄餐具?」
她:「咿咁唔環保!」
我:「煮飯時計劃好一點別用太多碗碟?」
她:「咁人哋已經好辛苦啦,仲要思考咁多嘢!」
我:「煮少幾餐呢?」
她:「咁我煮飯都係為佢好啫!」
到這裏,我放棄了,相信無論我提出多幾方案,她都只會回去「我都係為佢好啫」。
一個死都不願洗碗,一個偏要對方洗碗,兩個都在鬥氣,再講都係嘥氣。
結果,這對情侶沒多久就分手了,剩下的則苦了把單位租給他倆的業主,因為無人願交租,最後一戰更把單位摧殘得猶如戰場。事後,那個男的還要好威水地發表「飛女唔使畀錢」的偉論,那個女的,則繼續苦情委屈。
要怪,就只能怪這個男友太相信男女平等,而這個女友,又以為男人總會遷就女人,但為幾隻碗而搞出這局面,真的值得嗎?
周靈山,愛情及瘦身食譜作家。著作包括《你是女皇,他就是皇帝!》、《邊吃邊瘦!50道獨家瘦身食譜》。
個人網站︰https://lively.com.hk/
Instagram︰lively.com.hk