天氣凍到咁　食咩驅寒好？

寒流襲港，這幾天超凍，天文台預測嚟緊仲會凍多幾日，直至下星期中才稍為回暖少少。喺咁寒冷嘅日子，大家就要做足保溫措施，最方便簡單就梗係沖杯薑茶暖身喇！

薑，在中醫學角度來說，味辛性溫，有發汗解表、行氣活血、溫中驅寒、止咳解毒等作用。當天氣寒冷，可用一塊生薑磨皮拍爛，加入3至4湯匙紅糖煲薑水飲用，即有效暖身3至4小時。大家也可以利用薑煲煮湯水，同樣能發揮保暖作用。

之不過，並非人人都適宜進食，事關薑屬性熱又具有刺激性，若體質偏向實火或虛火旺盛、患有充血性眼睛疾病者，或患有肺腫、胃潰瘍、糖尿病等，都不適宜長期食用。若身體已處於發炎期，如高燒或喉嚨腫痛、口腔牙齦腫痛等，於此時進食薑，反而容易加重病情。此外，由於一般孕婦的體質偏燥熱，所以孕婦食用前，建議先諮詢註冊中醫師。

早上或午間就話沖杯薑茶飲，保暖幾個鐘，放工回家想食番味薑菜亦無難度，由經驗大廚教路，簡單用薑和葱等炒製豬腩肉或豬頸肉，幾個步驟即成，驅寒暖身。