好眠百科：日瞓8個鐘最標準？小心愈瞓愈攰

東網電視

瞓極都咁攰？一定係你唔識瞓喇！(設計圖片)

瞓覺要瞓幾耐先夠？常言道，一日要瞓足8個鐘，身體先有充分休息，但呢個講法，隨時呃咗你十年八年！

有冇發覺人愈大，瞓覺嘅時間就愈短？事關唔同年齡層嘅人，需要嘅睡眠時間亦唔一樣。有專家曾邀請5至90歲嘅人，檢測佢哋瞓覺時嘅腦波，發現15歲之後嘅平均睡眠時間已經短於8小時，70歲以上短於6小時。

咁係咪代表瞓得唔夠？非也。專家解釋，年輕人新陳代謝快，生活中消耗較多體力，所以要好好瞓上一覺；年長一輩消耗嘅能量減少，睡眠需求亦隨之降低。

所謂勉強冇幸福，即使勉強自己瞓夠8個鐘，可能都會瞓吓醒吓，反而令你覺得瞓唔熟，事關當你喺深層睡眠醒嚟嘅話，就算瞓幾耐，都會產生冇瞓飽嘅呆滯感，倒不如一醒就起身。

不過，每個人嘅睡眠時數都唔一樣，瞓得夠唔夠並唔係取決長短，而是質素取勝，只要你起身唔覺得攰，其實就瞓夠㗎啦！

---------------

是日IQ題：咩生果唔打字？

答案：蕉，因為不打字蕉（不打自招）

on.cc東網