世界係公平嘅，大家都係得24個鐘，咁我用少啲時間瞓覺，咪多你幾個鐘用囉！不過人唔瞓覺，係絕對唔可能。

有研究指，瞓覺可以消除疲勞，而且睡眠過程中，身體必要嘅物質又重新獲得補充，等你可以有精力工作，無限輪迴。

有人拎白老鼠做過不眠實驗，連續幾個星期冇得瞓嘅白老鼠會陸續死去，但屍體解剖並冇發現白老鼠器官有明顯損壞，反而係血液受到細菌感染而死。正常情況下呢啲細菌殺唔死人，不過如果你長期唔瞓，會慢慢損害免疫系統，最終咪搞死你囉。

相關嘅實驗仲話如果人連續72個鐘唔瞓，有可能導致精神失常。傳聞俄羅斯喺40年代進行咗一個「唔畀瞓」實驗。科學家將5個實驗者困喺同一個裝滿興奮劑嘅密室，並提供充足糧食及消閒工具。

頭5日大家都相安無事，去到第9日，實驗者開始精神崩潰，有人不停喺密室入面來回跑，有人尖叫，有人更推翻書櫃。過多幾日，實驗者更自挖內臟玩自殘...

以上實驗係真係假有待商榷，但世界上有人可以連續11日唔瞓覺！根據健力氏世界紀錄，一個17歲高中生喺1964年，創下264.4小時連續唔瞓覺，更紀錄出佢冇太多負面影響，只係脾氣比較暴躁，偶爾出現幻覺。之後補眠約廿個鐘，身體完全恢復正常。

---------------

是日IQ題：咩動物識打桌球？

.

.

.

.

.

.

答案：鷹，因為英式桌球（鷹識桌球）