電玩吹兩嘴：日系手遊精彩4月

闊別大家一個星期，電‧競女為了捉緊櫻花尾巴而閒遊日本。其實呢個時候遊日天色最怡人，反而返到香港又熱又濕，即時心情變得勁低落。唔想咁懨悶，電‧競女當然要推薦幾款最新日系手遊，包括期待已久的《GOD EATER RESONANT OPS》、台港澳上市的《黑騎士與白魔王》，以及搖乳系《療成敗！Shoot Nurse》，等大家可以輕鬆渡過呢個勁有初夏Feel嘅4月！

電‧競女早於去年初經已提過動作狩獵名作God Eater《噬神者》推出手遊，等足成年《GOD EATER RESONANT OPS》終於要在日本Google Play及iOS雙平台上市喇！遊戲以手提機《GOD EATER 2 RAGE BURST》結局後4年展開，玩家將使用最新的「神機」，聯同系列支部所登場過的眾多角色，攜手參與對「荒神」的大規模遠征作戰。為了對應在手機上的簡便操作，今次遊戲玩法由動作變成回合制RPG，玩家以3人角色組成隊伍出陣，當發動必殺技時更有迫力特寫畫面及聲優的震撼演出。對於玩厭咗《芒亨》的朋友，轉戰手遊版《GOD EATER》可說是個唔錯的選擇。

以12.8%超高SSR機率作招徠的《黑騎士與白魔王》，加上豪華聲優陣容，去年在日本推出經已深受好評，如今台港澳繁中版上周終於上市，相信唔少鍾情日系RPG遊戲的朋友已秒速下載。故事圍繞黑和白兩方陣營的抗衡角力，講述以「聖光石」維繫的王國因為黑騎士格拉姆斯和白魔王傑洛斯的決裂陷入混戰，熱血青年賽奧祈求能召喚異界英雄，亦即係玩家的降臨平定亂局。至於玩法方面遊戲就以「等待系統」讓玩家動下腦筋，由於敵我角色施展技能都需要時間「等待」，而發動時間的長短就在角色下方的計量表顯示，如何善用「等待時間」的空檔克敵制勝將會是本作的最大樂趣，當然遊戲也提供最大16 vs 16位玩家的公會對戰啦！咁過癮大家仲唔快啲刷番隻5星開局！？

日本奇情手遊題材特別多，新鮮滾熱辣就有款以「治療戰鬥」的《療成敗！Shoot Nurse》上架。遊戲以「護士」和「火箭」做主題，敵人唔使講當然係以妖魔化造型的「病毒」啦。顧名思義玩家就要和搭乘火箭出擊的護士聯手，以「手術」戰鬥擊倒病毒。而一眾美少女護士個個都係上圍豐滿，登場都要玩「搖乳」，就連戰鬥中召喚出的女醫生一樣都係激突身材，有時真係唔明遊戲主題係咪真係玩醫生、護士咁簡單呢！不過點都好，呢款遊戲以半自動戰鬥方式遊玩，玩家只要襟粒掣就可以輕鬆攻略，用來消磨時間都無所謂啦！