救世「煮」之 炒:爆炒

2018年04月17日 19:00
東網電視
更多新聞短片
爆炒指燒熱鑊後下小量底油,加上料頭醬料爆香,再放進食材調味急炒而成。(資料圖片)

今時今日,唔係話要廚藝超群,煮到識飛至可以入廚,只要肯試肯煮,人人都係大廚,之不過除咗煎炒煮炸之外,大家又識唔識燒燜煀扣等烹調方法呢?其實唔需要識晒,起碼知己知彼,學多一兩道板斧,有人問起都唔會口窒窒吖麻!
---------------
第三講‧爆炒
上一次講熟炒,仲教大家煮超好下飯嘅回鍋肉,而今次講嘅係爆炒。爆炒,即燒熱鑊後下小量底油,加上料頭醬料爆香,再放進食材調味急炒而成。基本上,還可以按使用唔同嘅料頭而分為醬爆、葱爆、蒜爆、辣爆、清爆等,如葱爆羊肉、辣子雞丁、醬爆牛肉、椒絲腐乳通菜、星洲炒米等。

京葱醬爆羊肉
葱爆羊肉屬經典京菜,具壯腰補陽健腎之效,而羊肉嫩滑,醬料配料辟去羊羶味,食落鮮香不羶,是不錯嘅酒餚和下飯菜。要注意嘅地方係,羊肉落鑊之後要用猛火快爆,令肉快熟,如掌握不了火候,熱力不夠,肉會出水,食味大減。

材料:
羊肉 300克
京葱 100克
辣椒 1條
青椒件 50克
胡椒粉 適量
黑椒 適量
鹽 適量
糖 適量
生抽 適量
生粉 適量
花雕酒 適量

做法:
1. 先將京葱切段、羊肉切件、辣椒切角備用。
2. 用鹽、糖、生抽、生粉、胡椒粉、黑椒將羊肉醃好。
3. 用油起鑊,放入羊肉、京葱、青椒件、鹽、生粉、花雕酒、胡椒粉及黑椒炒熟即成。