智能手錶Fitbit Versa 男女啱用

2018年04月17日 20:03
東網電視
更多新聞短片
錶面備有1.34吋屏幕,亮度達1,000nits,顯示清晰。

Fitbit的智能手帶就出晒名,不過主要功能始終是運動追蹤,想功能更多元化,大可考慮新推出的智能手錶Versa。作為品牌第二款智能手錶,Versa繼續採用正方形錶面,設有1.34吋彩色屏幕,除了觸控屏幕,錶側亦設有3個按鍵,操作就手。錶殼用上鋁合金製作,非常輕巧,配合50米防水,適合不同場合佩戴。配色則有三款,包括玫瑰金色錶殼配桃紅色膠錶帶、銀色錶殼配灰色膠錶帶,以及黑色錶殼及黑色膠錶帶。另有特別版換上織布錶帶,廠商亦會推出其他款式錶帶,例如Horween皮革錶帶、鋼織錶帶等,日日換款都得。

Versa的健康、運動功能當然是焦點,除了日常的計步、卡路里消耗、PurePulse心跳監測之外,更內置超過15個運動訓練,包括跑步、單車、舉重、游泳等,亦有教練模式,非常全面。此外,新錶更加入女性健康功能,可以記錄生理周期時間及症狀,相當貼心。

至於其他功能,包括手機通知提示及快速回覆,亦可以下載不同應用程式擴充。不過,手錶付款等功能香港暫時未開通。

同場亦推出專為兒童而設的智能手帶Ace,設計與Alta相似,不過換上紫、藍兩色,而錶帶亦比成人款式短,方便小朋友佩戴。功能方面就有活動追蹤、走動提醒,並設有榮譽獎勵鼓勵小朋友完成運動目標。