電玩吹兩咀：《Nintendo Labo》衝唔衝得過？

提起呢個星期Game壇話題，不得不提剛於本周5發售嘅任天堂紙箱玩具「Nintendo Labo」啦，不過就算上架並不代表各位玩家有得買，電‧競女聽講代理頭一批行貨只勉強夠供應訂客，街客想買就要捱水貨兼食炒價。其實前陣子官方再為產品的「Toy-Con Garage」創造模式推出宣傳片。各位衝唔衝好？呢個問題今集節目同大家傾吓！節目亦都會同大家關注電影《挑戰者一號》的相關遊戲呢！

打着「實驗室」名號推出的Nintendo Labo，套用以往Wii遊戲專用的控制器套件概念，變成提供預製紙板模型，讓玩家摺成各式Toy-Con控制器，化身成電單車的把手、釣魚用的魚桿、識得躲避障礙物的機械人、演奏用的鋼琴，以及飼養住在紙皮屋仔內的趣怪寵物。而前陣子任天堂亦為Nintendo Labo內置的自由創作模式「Toy-Con Garage」拍片，教大家怎樣以觸碰Switch畫面上的區塊作為發聲點，套上橡皮筋並透過Joy-Con充當轉Chord，將Switch變成一支電結他！其實講咗咁多，Nintendo Labo着重創作遊戲過程，跟一般玩得爽、打得爆嘅遊戲完全不同，電‧競女就認為用作親子互動的遊戲體驗就最適合不過，或者情侶合力拼砌組裝，享受有趣過程，所以上述兩類玩家，相信Nintendo Labo都會令大家樂而忘返。

動畫最新作《驚爆危機！Invisible Victory》本周正式開播，故事圍繞在受到阿瑪爾干毀滅性攻擊的米斯里魯，迫於無奈隨雷納德離去的小要，為了追尋阿瑪爾干的蹤影而潛入了「拿姆查克」的宗介一行人等劇情交雜展開。全新真實系機械人卡通加上早排《機戰X》熱潮，令到5月31日上市的SLG戰略模擬遊戲《驚爆危機！戰鬥的Who Dares Wins》備受矚目。遊戲以《驚爆危機！》獨立成篇，玩法比較似Wii U平台的《機戰Neo》，機體以方圓範圍作線性移動，以非一貫機戰的棋盤格局，另外立體戰鬥都是靠擊破敵機部位累積傷害。講真，電‧競女覺得本作相當「粉絲向」，事關佢無《機戰》系列般有豐富登場機體，唔係動畫忠粉一定嫌悶呢！

電影《挑戰者一號》全球一致好評，大家都覺得呢個VR社群《綠洲》晌不久嘅將來將會真實地發生，其實唔使等到20-30年後，依家就已經有得畀大家玩，近日PC Steam平台就有一款電影改編VR遊戲《Ready Player One: OASIS beta》推出，玩家可以化身成電影中主角韋德，在廢棄汽車廂內佩戴VR眼鏡進入《綠洲》世界。呢個Beta版內藏3款遊戲，分別是《Battle for the Oasis》、《Gauntlet》以及《Rise of The Gunters》。第1款要玩家化身革命軍，在行星上迎戰「創線企」（IOI）兵團，第2款就要深入地下，為了財寶和不死軍團激戰，至於第3款顧名思義就要結伴對付其他爭奪彩蛋的玩家啦。電‧競女睇落還原度都幾高，屋企有VR裝置的玩家不妨一試。