今日係……織田信長誕生紀念日

20180623
東網電視
更多新聞短片
6月23日就係織田信長嘅誕生紀念日
提到日本戰國時代,相信香港人對之認識不深,大概只係會聯想起豐臣秀吉以及德川家康兩位著名戰國君主,不過對於了解日本戰國史嘅朋友應該就會諗起與二人並稱為「戰國三英傑」嘅一代霸主──織田信長,而6月23日就係織田信長嘅誕生紀念日。
織田信長出生於1534年6月23日,於1568年至1582年間為咗成為掌控日本政局之領導人,推翻管治日本200多年嘅足利幕府,令日本從應仁之亂起持續百年以上嘅亂世邁向終結。
織田信長出生於尾張國(即現今愛知縣西部)勝幡城(亦有人指係那古野城)出生。信長父親織田信秀死後,信長以嫡長子身份繼承家督之職,於在國內爭亂中打敗親弟信行、清洲城主織田信友、犬山城主織田信清和岩倉城主織田信安,成功統一尾張國。及後,織田信長逐一擊破周邊敵對勢力如三河今川氏,以及美濃齋藤氏與南近江六角氏,之後順利到達京都擁立足利義昭為將軍。
之後足利義昭與信長為敵,下令武田氏、淺井氏、朝倉氏、比叡山延曆寺、鈴木雜賀眾、石山本願寺等勢力,組成第一次信長包圍網,意圖消滅織田信長。而織田信長其時勢力強盛,加上有大量名將如羽柴秀吉(即後來之豐臣秀吉)、明智光秀、柴田勝家、竹中半兵衛、前田利家等幫助,逐一將各個勢力消除,瓦解了包圍網,再將足利義昭放逐。不過,當織果信長由京畿一帶擴展至山陰山陽地方時,於1582年遭遇到家臣明智光秀背叛而死,史稱為本能寺之變,終年48歲。
關於織田信長嘅歷史同傳說都相當豐富,亦相當富有傳奇性,令織田信長成為後世好多電影、小說、電視劇等等作品嘅取材對象,又由於織田信長喺日本戰國歷史佔有極之重要嘅地方,所以影視作品都會搵一個知名又有份量嘅演員扮演,例如知名大河劇《利家與松~加賀百萬石物語~》就搵來反町隆史演出織田信長一角,而《織田信長~奪取天下的傻瓜》就由木村拓哉飾演織田信長。另外,日本遊戲商光榮推出嘅電子遊戲《信長之野望》系列亦係以織田信長嘅故事作為發展主軸,對於電子遊戲迷嚟講相信一點都唔會陌生。