我唔係大廚，亦無上過堂學過廚，只係由細幫手入廚煮飯，可以說係由細煮到大，兼因為做嘢接觸好多大廚，偷到唔少師，唔敢話煮餸好叻，但堅鍾意煮，又乜都敢煮敢試嘅現代港女。

－－－－－－－－－－－－－－

秋葵有一層絨毛，切開，有分量十足嘅黏液，很多人都見到嗰層毛同「鬼口水」般嘅黏液即退避三舍，如果你都係，咁就錯過咗呢款超級食物喇！

秋葵又叫羊角豆、黃蜀葵或毛茄，在5月至9月夏天盛產，功效多多，營養豐富，而黏液含豐富可溶性膳食纖維如果膠、醣蛋白等，加上蘊含水分、維他命A、B、C及礦物質元素包括磷、鐵、鉀、鈣、鋅、錳等，豐富嘅膳食纖維帶來飽足感，又可以阻止腸道碳水化合物消化，降低葡萄糖吸收，有助控制體重，又能護胃、美肌及降血糖，好處多到呢，故又有「植物界黃金」美譽，日本人更稱之為「綠色人參」。換句話說，秋葵入面嘅黏液營養豐富、功效多多，所以不能洗走，但至於外層的絨面就要去除，否則食起嚟會刺癢影響口感之餘，落到胃仲有機會黏住胃壁。

點去毛？很簡單，只需用少許鹽搓揉一下，再用水清洗即可，便能輕易磨掉兼洗走。此外，記得要去掉較粗糙嘅部分，即椗位附近嘅稜角位，切時小心削，唔好將秋葵切開，免得黏液流走。

至於煮法，一般都是原條烚煮分零兩分鐘，過一過冷水或冰鎮，沾一些豉油Wasabi或日式芝麻醬食用，清新爽脆。也有不少人愛將烚過的秋葵切粒炮製成沙律，橫切呈星形，美觀又精緻，配以蔬菜或水果及沙律醬，是不錯嘅消暑健康菜。

日本人除了愛將秋葵冰鎮或沙律食用之外，也會用來炮製天婦羅，小妹愛香口，又懶，於是乎最愛用現成天婦羅粉（日本或韓國出品皆可）加凍開水攪成漿，將處理清洗好的秋葵瀝乾水後原隻（大家都可以斜刀切半）蘸漿，炸至金黃色即成，用廚房紙瀝乾油後撒點鹽或七味粉都非常美味，作下酒菜一流。