沙灘必備！ 10大神器
20180812
東網電視
更多新聞短片
想輕鬆自在去沙灘玩，咁就要齊備以下10大神器喇！
酷熱天氣警告幾乎日日高掛，走到沙灘消暑降溫絕對係好選擇！去到沙灘，例必見到有人起勢用力吹脹浮床水泡，又或者周身沙左拍右掃等情境。想去沙灘玩得輕鬆自在，今次就為大家盤點坊間10大沙灘神器，究竟真係神奇，抑或絕粹綽頭？即刻分曉！
【1.Flextail Max Pump Plus 瞬間充氣】
又要玩沙灘波，又想瞓浮床，最重要係有人負責吹脹所有充氣用品！唔想吹到缺氧頭暈兼面容扭曲，僅重150g的Flextail Max Pump Plus就大派用場。Max Pump Plus可以輸出2,000Pa氣壓，一次充電就足夠為50個水泡充氣，實測泵小型沙灘波只需10秒！Max Pump Plus仲兼備真空吸氣功能，收拾充氣用品時就更加輕鬆方便。
神奇指數：＊＊＊＊
【2.Matador Droplet 超迷你收納】
要手機、銀包免受海水、沙粒侵襲，儲物的收納袋當然要輕便防水。美國品牌Matador Droplet Wet Bag就採用防撕裂尼龍物料，配合矽化PU塗層，達至100%防水。而且物料輕巧，折疊後更可以放入一個水滴形矽膠殼內，便攜度、過癮度都滿分。美中不足係容量只有3L，如果有容量更大的版本就更加好。
神奇指數：＊＊＊
【3.Lunatec Aquabot 飲得噴得】
去完沙灘周身沙，場地又唔一定有沖身設施，確實狼狽。Aquabot外形同一般水樽大同小異，設有1,000毫升容量，除了可以裝水飲，最特別是備有壓力噴射樽蓋，手動泵氣後就可以射出小水柱或者噴霧。水柱力量仲超勁，官方表示可以射至8米，用來沖走手腳上沙粒簡直易如反掌。
神奇指數：＊＊＊＊
【4.Mog One 驅走惡蚊】
曬太陽打大赤肋，好容易就成為毒蚊的下手對象。唔想太陽油、蚊怕水全部搽上身，咁就可以試下Mog One。來自韓國的Mog One其實係電子驅蚊器，透過聲波模擬雄性蚊子飛行頻率，防止雌性蚊子在附近出現，達至防蚊效果。Mog One外形同一個鎖匙扣差唔多，可以掛於手袋、褲頭上，並且採用USB充電，充電30分鐘就可以使用約30小時。
神奇指數：＊＊＊
【5.Lagu沙灘巾 免黏沙粒】
沙灘沙粒熱辣辣，梗係要舖墊先可以躺下曬太陽。不過膠墊又唔舒服，用毛巾又黏沙難清理。澳洲品牌Lagu推出沙灘巾就以防沙作為賣點，亞麻混紡面料乾濕情況下都唔會黏沙，只要輕力一揈就可以將沙灘巾表面的沙粒完全揈走。Lagu沙灘巾面積約1.52×1.14米，而且更有防過敏、快乾特點，質素亦相當柔軟，用嚟做毛巾抹身、抹腳都冇問題。
神奇指數：＊＊＊＊＊
【6.Lunar 百變燈】
沙灘通常燈光不足，玩得太夜梗係要帶備照明裝備。呢款來自集資網Kickstarter的Lunar，外形源自舊時的火水燈，夠晒經典。而且Lunar設有兩樣配件，可以將火水燈搖身一變成為提燈或者電筒，加上隨時調校亮度及支援IPX4防水，戶外使用一流！此外，Lunar更內置10,000mAh電池，使用時間長達10天之餘，亦可以當作外置充電器使用。
神奇指數：＊＊＊＊
【7.Button Pouch 2.0 防水影相】
海水一向是手機的天敵，要好好保護手機，防水袋可以話係必備！由Air Button推出的Button Pouch 2.0支援IPX8防水標準，可以容納6吋屏幕或以下的手機，而且採用鎖扣設計，比一般魔術貼設計更加穩陣。Button Pouch 2.0的袋身更設有兩個按鍵，配合袋內的藍牙小遙控，落水都可以隨時影相、拍片。官方更提供《Camera Blue》拍攝App，拍攝時會自動將相片的色差、色溫調整，影靚相更容易。
神奇指數：＊＊＊
【8.Dezzio沙灘袋 一袋多用】
沙灘袋一般都係透明塑膠，手感差、外觀醜！Dezzio外形同一般Tote Bag相似，但其實功能多多，不但設有間隔擺放小物，最正是兩邊口袋係保冷格，拉鏈位竟然係開瓶器，更加設有充電器專用格，真係估你唔到。袋身用上防水帆布，而袋身底部更可以拆除，令網面底部外露方便搖走沙粒。
神奇指數：＊＊＊＊＊
【9.Beach Vault 收納防盜】
沙灘人來人往，必定要打醒十二分精神留意財物。想更加安全，Beach Vault可能幫到手。Beach Vault是一個螺旋狀設計的收納盒，容量夠大可以擺放平板、手機等物件之餘，特別在於整個盒可以鑽入泥沙中，並附設專用浴巾及頭枕覆蓋，自然神不知鬼不覺！
神奇指數：＊＊＊＊
【10.冰霸杯 平價保冷】
熱日當空，飲品要保持冰凍實在有難度。呢款台灣近期勁Hit、俗稱「冰霸杯」的不銹鋼杯，杯身容量夠大，可以直接放入一杯台式飲品。最大賣點就是24小時保冷，記者實測放滿冰粒後帶去沙灘曝曬3小時，再於常溫擺放3小時，最後只係融化約1/3的冰粒，保冷效果誇張。最吸引是「冰霸杯」定價只是幾十元，抵玩！
神奇指數：＊＊＊＊