女士喺揀Bra嘅時候其中一個考慮要素，就係顏色會唔會太過鮮艷，出現透Bra嘅尷尬情況。對於透Bra問題，日本有內衣品牌便進行測試，睇吓邊種顏色嘅Bra最唔易現形。其實呢個測試嘅原意，並非針對在職女性而設，反而係畀日本嘅教育界作為參考。原來日本有部分學校規定女生只能穿着白色或肉色嘅內衣，理由係呢兩種顏色冇咁透現出嚟。為咗證明呢個講法係錯，日本服裝品牌BODY FOCUS早前喺官方Twitter上公開自家測試嘅結果，希望日本教育界能夠明白真相。佢哋分別將白色、粉紅色、淺藍色、肉色、紅色及深藍色嘅卡紙，放喺接近肉色嘅紙皮上，然後蓋上一層常見用於製造女生校服嘅布料，結果發現愈係比膚色淺嘅顏色，如白色、粉紅色及淺藍色，反而愈透現，而最唔透現嘅竟係喺唔少人眼中鮮艷嘅紅色。佢哋認為若然學校硬性規定一定要着白色內衣嘅話，建議最好喺裏面多穿一件底衫。有日本網民則認為，相對冇得揀制服質料嘅女學生嚟講，在職女士最重要係揀選一啲唔易透底嘅衣物，即使內衣顏色鮮艷都唔使擔心會透現出嚟。