風球都食得？

叫人食西北風就聽得多，但好多風球名又真係同食有關，好似超級颱風「山竹」咪食得囉，講嘅當然係「果后」山竹喇！名字由泰國提供，既然名字中有「果后」，無理由無「果王」吧？係，原來確實出現過「榴槤」風暴，唔係，係颱風至啱！

颱風「榴槤」於2006年廣泛及嚴重破壞菲律賓及越南，世界氣象組織（World Meteorological Organization）颱風委員會成員如果受到熱帶氣旋影響，造成嚴重人命傷亡或經濟損失嘅話，可以喺受影響嘅一年內提出除名要求，將該熱帶氣旋名字永久刪除，而颱風「榴槤」威力強勁，造成極大傷亡，於是喺2006年12月被除名，改由同樣由泰國命名嘅「山竹」頂上。

颱風名字由2000年開始，由世界氣象組織颱風委員會成員提供，而香港亦係成員之一。起名方面，當然有要求，好似話唔可以太多字母、要容易發音、唔可以係商業品牌等，而用食物命名嘅都唔少，好似曾出現嘅果王榴槤，以及依家嘅超級颱風山竹外，還有由韓國命名嘅鮎魚、日本命名嘅劍魚等。搜集資訊時，還發現一個有趣情況，就係東南亞國家非常喜歡用花來幫颱風命名，好似杜鵑、木蘭、梅花、百合、玫瑰、薔薇等，聽落有詩意得多。