街市學堂之澳洲大大粒波子提　你食過未？

夏天將至，又到盛產水果的季節。最近行開街市，就會發現好多特色生果上市。好像位於大圍街市的其中一個水果檔，單是提子款式已有4、5款，原來現在正值澳洲提子當造季節，有紅色、青色、黑色，就連形狀大小都不同。當中包括一隻全新品種的澳洲青提，看起來有點似日本香印的提子品種，原來是澳洲青提的一種，名叫波子提，是將日本香印種子移植到澳洲種植而成，因此，又名澳洲香印。

波子青提比一般澳洲青提大粒好多，皮薄爽脆又多汁，甜度極高而且完全沒酸味，價錢亦比一般青提貴幾倍，每磅至少要HK$60以上。除波子青提外，澳洲手指黑提亦是近期熱賣的品種，其外形又長又幼，好似手指一樣的黑提，果肉爽甜多汁，但提子皮就略帶澀味。至於大家較為熟悉的澳洲紅提，分為有核和無核兩種。有核紅提比較圓渾大粒，飽滿多汁兼口感豐富，吃起來啖啖果肉都香軟清甜。而無核紅提雖然比較細粒，但就皮薄果肉結實有彈性，大家不妨視乎個人口味入貨。