街市學堂：街市買鮮鮑點處理？

鮑魚位列鮑、參、翅、肚四大海味之首，肉質嫩滑、味道鮮美，大時大節都一定會以此做餸。鮑魚主要分3種形式發售，曬成乾鮑、製成罐頭鮑，又或者買新鮮貨，今日就介紹一下街市都買得到的新鮮鮑魚。

南非鮑魚夠重秤

中國、日本、澳洲、南非等地都盛產鮑魚，街市賣的通常是大連鮑魚，至於體形大的南非鮑魚身價較高，一般在過年過節才較常見。

清洗鮑魚小秘訣

鮑魚表面滑潺潺，所以正式煮之前要先清洗乾淨，一般人會用牙刷慢慢刷，其實用百潔布輕力擦幾下已乾淨，細細力就不怕刷爛，之後再用生粉和清水徹底洗淨就可安心炮製。

鮮鮑煮法多元化

至於鮮鮑的煮法也相當多元化，最常見就是用來蒸或煲湯，原來與蘆筍、西芹、西蘭花或洋葱同炒非常惹味，加XO醬更香口。另外也可以先拖水再煮10分鐘，為公仔麵加餸即變上乘美食。