本日日本：抗疫期間便利店竟然變成……

新冠肺炎嘅疫情喺日本仍未受到控制，當地各大企業自然要密謀對策，預防疫症繼續蔓延。其中三大連鎖便利店7-11、Family Mart及Lawson自然唔例外，除咗要求要員工加倍注意衞生，例如佩戴口罩、勤洗手及消毒雙手之外，亦忽然多咗好多不一樣嘅防疫設計及規矩要遵守。以7-11為例，喺收銀處設置咗透明嘅膠幕，以防飛沫傳播。而且為確保有足夠嘅社交距離，於店內用餐區亦要隔開一個座位，排隊付款亦要依照地下的圖案指示，與前後嘅顧客保持距離。而Family Mart則會將店門打開，盡量保持一個通風環境，店員收錢或找錢會使用散紙盤，並唔會直接用手接錢。而Lawson除以上措施外，亦會增加自助付款及用電話付款嘅設施，減少人與人接觸嘅機會。身為顧客自然感到更加放心，唔知香港嘅便利店會唔會考慮引入呢？