獨家消息：天恩邨蚊型廁所害苦居民

房屋署早前宣布將為屯門寶田邨的「蚊型廁所」進行擴建工程，但同期落成、亦為中轉房屋設計的天水圍天恩邨第一期，原來亦有逾三千個單位廁所面積不足一平方米，卻未有納有擴建之列。年逾八十的梁伯入住天恩邨近十年，數年前因受傷致行動不便，坦言每次進入廁所均「難過登天」，「個廁所細到轉唔到身，成日都撞到隻手瘀晒！」需貼身照顧丈夫的梁妻則指廁所過於狹窄，致無法陪伴進出，「好擔心佢再跌親，唯有佢沖親涼、去親廁所都企喺門口等，希望房署快啲改善下！」

另一住戶溫女士亦遇相同問題，「窄到想伸直對手都唔得，沖完涼更加唔使旨意可以喺入面着衫！」鑑於廁所過於狹窄，獨居的溫女士為免沾濕衣服，每日洗澡後均要走出客廳穿衣，在近月持續寒冷的天氣下，坦言「凍到騰騰震，分分鐘凍到病」。

房署發言人承認，天恩邨第一期共有三千五百二十八個單位，廁所面積一般小於一平方米，但強調出租前會向申請人作清楚解釋，居民亦可享有較低租金及一個月的額外免租期，若因醫療因素難以繼續在單位居住，房署亦會酌情考慮特別調遷。對於被指改善措施欠奉，發言人則指寶田邨的單位廁所擴建工程建議同樣適用於天恩邨，而有關計劃仍在審議階段。

當區區議員趙秀嫻指天恩邨「蚊型廁所」問題已持續多時，過往從未聞房署提出改善方案，直至接獲傳媒查詢始急作澄清，有「唔踢唔郁」之嫌。趙又稱，邨內人口老化、家庭狀況改變，居民對擴建單位廁所的需求亦愈見逼切，「好似有啲家庭生咗小朋友，想幫仔女沖涼都唔得，成個廁所連埋浴室都唔夠兩隻手位咁長，一個人企人入都難，一郁身就撞到洗手盤或者花灑喉，真係牙煙！」

公屋聯會主席王坤亦要求房署盡快進行改善工程，「個廁所咁窄，對啲老人家同大肚婆嚟講真係有危險，佢哋好易會撞親甚至跌倒，房署再咁拖落去都唔係辦法！」