黃之鋒人細鬼大　黃雨當街攬女

學民思潮由反國民教育科至推出政改方案，召集人黃之鋒成為風頭躉，但過去有關佢嘅只係政治新聞，反而戀情就鮮有傳出。不過，今日下午五點幾鐘在旺角兆萬中心對開，黃之鋒被發現攬住一名少女並行，沿途有講有笑，尤其今日兩度懸掛黃色暴雨警告信號，一把細小雨傘兩份遮，所以有咁實攬咁實，狀甚親暱。

同之鋒一齊啲少女穿着牛仔短褲，上身就同之鋒一齊着上情侶間條衫，之鋒右手臂彎一直攬住女方，並同女方一齊擔遮，左手則挽住一個時裝品牌嘅紙袋，呢間店嘅旺角都有分店，相信係佢哋之前行街有所斬獲。雖然兩人攬到實一實，但在滂沱大雨下，難免要濕身。

之鋒被問到嗰名少女嘅身份，佢就好斬釘截鐵話唔會回應任何揣測或傳言，之後佢又「遊花園」，話近期學民思潮電郵戶口疑被黑客入侵、懷疑有人跟蹤，所以對四方八面評論不作回應，講政改方案就冇問題喎。不過，有相為證，唔係揣測或傳言，唔通佢驚戀情「見光死」？