揭悲劇家庭早破碎　查案警感言震全城

深水埗昨晚發生駭人聽聞的家庭慘劇，榮昌邨榮俊樓一名37歲的母親疑失常用菜刀斬死一歲半的親女，警方列作謀殺案處理。警方當時在單位廚房發現該女嬰倒臥地上，已無呼吸，身上有十多處刀傷，地下一大片血跡。這宗血腥慘劇令當時調查的警員也為之側目，一名負責調查該案，任職26年的老差骨深夜在網上留言稱，多年來見慣不同案件與兇案，事後對事件非常感慨，其感言震撼全城。

「唔知點解，撈咗咁多年，接過無數咁多單老謀，呢單最心酸，响現場一路做一路想喊，個妹妹好得意，比媽咪响條頸度斬咗十幾刀，個頭爭啲甩，事發時哥哥响屋外。」老差骨感言死者的9歲哥哥與其幼子差不多年紀，感受更錐心：「無論身形和年紀，都同我細仔好似，個細路好乖好平靜，好詳細咁答我哋問題，我好唔忍心問，佢同我講自從舊年中秋開始，就無見過爸爸啦，而佢一晚之間無咗妹妹，媽媽會面對無限期的醫院令，佢的將來會點？我問佢你肚餓嘛，佢話叔叔，其實我餓的，但我食唔落，我聽完個心好痛，我入屋幫佢執啲替換衫褲時，佢重提我可唔可以幫佢執埋套運動衫，我聽日要上運動堂。我當時真係拎轉面，啲眼淚忍唔住流咗出嚟。」

老差骨又稱：「啲兄弟執嘢準備離開時，我坐在AP(疑兇)張床度(因為成屋血，我實在搵唔到其他地方坐)我望住間屋，無冷氣，成屋得兩把風扇仔，搵晒全屋連一張全家合照都無，淨得一張用舊日曆寫的紙，上面寫住「忍 退一步海闊天空，但最後‧‧‧‧‧‧」「望住妹妹的衫仔鞋仔，玩緊的積木散落一地，好似代表頭家一樣，散」，「個心好痛好痛，小朋友有咩罪？」最後更寄語，希望他人明白「活在當下之後要珍惜眼前人」。