李漢奸民主阿婆　訪英自取其辱

香港每逢有大事發生或政改關鍵時刻，人稱「李漢奸」嘅民主黨創黨主席李柱銘同「民主阿婆」前政務司司長陳方安生就會出動密謀攪局。佢哋繼幾個月前飛去美國同加拿大「唱衰」香港後，呢幾日又趁港府發表政改諮詢報告，飛去英國「唱衰」香港，日前同英國副首相克萊格會面後，尋日仲去埋國會外交事務委員會出席聽證會，美其名話講解香港情況，實質乞求干預。唔知係咪英國佬啱啱攞完中國着數，一班國會議員反而不停質疑兩人有冇誇大情況，又話聽完兩人匯報，感覺香港情況唔係咁差，佢哋今趟真係自取其辱！

李漢奸同民主阿婆尋日出席聽證會時，一開始民主阿婆就發炮，批評中央多方面損害一國兩制、新聞自由受到打壓、特首無民意授權、司法獨立受到影響等，講到好似世界末日咁。不過，班英國議員唔係隨便聽你亂講，有議員要求佢舉出新聞自由受壓嘅例子，點知民主阿婆講來講去都只係話有報紙被抽廣告，始終講唔出有咩實質例子。就算在場嘅李漢奸出手，都只係講到有電台節目主持被炒。

不過，當英國議員質疑到底市民透過電台、電視台及互聯網接收新聞時，有冇受阻先？李漢奸就死死哋氣話冇，但死撐話審查情況逐漸嚴重，唔可以掉以輕心喎。李漢奸繼續話，國務院白皮書竟然要法官愛國，令本港司法獨立嚴重受損。隨即又被議員質疑，到底有冇法官因此而影響判決先？佢面色再沉，話現階段無，但長此落去好難無喎。民主阿婆就幫口，話白皮書係重新演繹《基本法》及一國兩制，要求英方唔可以咩都睇唔到，一定要幫香港出聲。

在座多位議員聽兩人發表完「偉論」後，都覺得香港冇乜重大轉變，只係兩人過分解讀，仲話香港始終唔係獨立國家，一國兩制唔代表中國無權管治香港。如果兩人咁信賴英國，咁就好應該聽吓人哋講啦，唔好再發白夢。會面後，外交部發言人洪磊即刻發表聲明，不滿英國副首相同兩人見面，又話中方已向英方提出嚴正交涉，要求英方停止任何干涉香港事務動作。

以往英、美等國家聯手，經常同中國針鋒相對，但今時唔同往日，國家領導人早前先至去完英國簽訂一份價值二千三百億港元嘅採購合同，俗語話有錢使得鬼推磨，試問班英國議員點會睬你兩個已經冇晒能量嘅香港「舊電池」吖！兩人山長水遠飛去英國諗住「唱衰」香港，乞求外國勢力干預，點知被啲紅鬚綠眼人噴到一面屁，唔係自取其辱又係咩呢？