79K專線小巴頻加價　小市民「硬食」

往來柏景灣與港鐵旺角東站的79K專線小巴，乃海富苑居民乘搭東鐵線的唯一「駁腳」交通工具，平日載客量極高。不過，有關路線營辦商卻以經營成本上升為由，1年內2度加價，總加幅近2成，引起居民不滿。

「明明上年先加完價，有乜理由咁快又加？話就話加幾毫子，但一程車咁短路程都收4個幾，真係好唔合理！」家住大角咀海富苑的陳小姐習慣乘搭79K專線小巴往旺角東站，再乘搭港鐵上班，車程只需約10分鐘，惟自去年4月由4元加價至4.4元後，營辦商竟於今年1月再度加價，「聽講營辦商舊年12月已經同咗附近大廈法團講話會加價，但我都係佢加咗價先知，唔搭佢又冇乜其他車可以搭，咪即係搶錢！」

記者曾到海富苑小巴站頭了解，發現絕大部分居民均指加價前並未獲悉加價一事，其中李女士更直指加幅不合理，揚言不再乘搭，「車程又唔係長，但都要4個幾一程，咁貴我就唔搭啦！」但亦有街坊指出79K小巴乃海富苑居民乘搭東鐵線的主要「駁腳」交通工具，即使車費一加再加，亦需「焗住搭」，不滿運輸署監管不力，令營辦商可自恃「唔憂冇客」而肆意加價。

運輸署發言人證實，有關路線經營成本持續上升，令營辦商經營變得非常困難，即使去年4月加價後，新增收入仍未能彌補不斷上升的經營成本，持續錄得虧損。經去年12月初諮詢地區人士及與營辦商磋商後，將原先建議的4.8元車費調低至4.7元，新車費已於1月中旬生效，營辦商亦會提供短期長者優惠車費。

「海富苑得1幢係租置公屋，其餘5幢都係公屋，大部分街坊都唔係有錢，點解1年加2次價運輸署都照批？」大角咀地區發展主任余德寶表示，自79K線小巴再度加價後，即接獲不少街坊投訴，質疑運輸署未有盡把關之責，要求當局檢討現有專線小巴發牌及監管機制，以防營辦商不斷以「經營成本上升」為由加價，「叫得做公共交通工具，就唔應該下下將經營成本轉嫁畀市民，而且運輸署話營辦商加咗價都蝕錢，條線本身已經好多人搭，咁係咪即係個營辦商經營不善？運輸署好應該了解清楚！」