網民熱話：淆底P牌仔水壩阻巴士前行招喪笑

放假特別多「P牌仔」在路上出沒，有網民在社交網站一個專頁上載「P牌仔阻住地球轉」片段，聲稱巴士在大潭水壩的雙程窄路上遇上「唔敢郁」的P牌私家車。

片段中有在逆線而來的巴士乘客，從窗外拍低前方一架對頭私家車「騰雞」停在行車分界線中間近1分鐘都無動靜，令巴士動彈不得。雖然P牌車司機曾嘗試「稍移玉步」，向左行駛移離中間，欲靠近壩旁行駛，好讓巴士有空間行駛，但司機似乎「淆底」，驚撞向壩旁石壆，弄花「靚車」，對巴士寸步難讓。巴士內多名乘客則已按捺不住，齊齊化身「花生友」，有人喪笑，亦有人怒罵：「個司機真係好渣囉！」、「條路咁闊都霸晒條路！」、「家陣要巴士就佢呀陰公！」

約分半鐘後，一名電單車司機路經都看不過眼，停車走到路邊指導P牌仔駛近壩邊，但電單車司機離開後，P牌司機似乎點極都「唔明」，仍滯留公路，隨後有3至4名踏單車的年青人，都逼塞住未能開路。P牌司機擾攘2分鐘後，終於鼓起勇氣靠左行駛，巴士終於有空間繼續前行。片段上載後有多人讚好，有網民大彈片中P牌司機駕駛技術不及格，質疑小型車在公路上應先讓大車行駛；不過亦有網民同情P牌司機：「有邊個未新手過呢其實？」

網民有話說

Calvin Chiu：「P牌唔緊要，但有乜理由叫巴士退後讓你！」

Pat Fun Fan：「片中話人渣、屎(的人)，有無車牌嫁？咁勁落去幫拖啦！拖住成車人，你都好意思！」

Yarmy Cheng：「兩邊壩頭有牌寫住，請讓巴士行先！」

Lok Fung：「成車花生友。話人手車"炸"(渣)果位男士。我睇你點叻！」

Buddy Tong：「細車讓大車是常識吧？」

Sfire Ho Siufung：「有邊個未新手過呢其實？驚整花架車都人之常情呱。」

Ivan Poon：「一到假期就係咁，仲要長假期，啲廢柴假日車就好似落閘放狗咁，四圍害人！」