黎智英密會泛民　李漢奸等涉嫌知法犯法超載

政改方案公布在即，又到「搞事四人幫」密會搞局嘅時候喇！今日卓妮又影到壹傳媒集團前主席黎智英（肥佬黎），與另外兩名「搞事四人幫」成員「李漢奸」民主黨創黨主席李柱銘、「民主阿婆」前政務司司長陳方安生，再加上公民黨主席余若薇秘密飯聚。其後李漢奸、民主阿婆及余若薇等人離開時，仲涉嫌知法犯法，5個人坐入一輛私家房車離開，連司機共6人明顯超載。飯完聚再涉嫌犯罪，其中兩個仲係資深大律師添，香港被佢哋咁樣搞法真係冇晒法治！

今午約6時半，肥佬黎兩公婆一齊乘座駕去咗位於西半山屋蘭士里嘅豪華大廈，落車時見到兩人拎住束花及一個環保袋，估計裏面載住啲靚酒，之後肥佬黎其中一名兒子亦到場。

到晚上10時正，卓妮就見到李漢奸夫婦、余若薇夫婦，仲有民主阿婆一行5人從豪華大廈行出嚟。由於條路相當斜，有名你叫「民主阿婆」嘅陳方安生行得好驚險，幸得余若薇老公、醫生胡健維出手相助，扶民主阿婆一把，否則隨時唔係行落去，而係轆落去！

5人行到柏道街口後，胡健維個司機一早駛定車喺度等候，但架車連司機最只可載5個人，點算好呢？眾人決定連的士錢都慳番，死塞爛塞一齊坐晒入架車度，其中余若薇夫婦、民主阿婆及李漢奸太太4個人逼晒喺後座，最瘦嘅李漢奸反而坐前座。「超載五人組」離去後約5分鐘，肥佬黎一家三口亦坐車離開，真係唔明佢點解唔肯載走其中1人，每架車載5個人，咁咪唔使知法犯法囉！