福榮街違泊上落貨　居民冇日安寧

長沙灣福榮街其中一段位處工廠區，車輛違泊問題經年未有解決，自毗連的元州邨五期入伙後，居民即發現貨車過貨噪音製造造嚴重滋擾，行車線亦變身「免費停車場」，加上大量雜物堆積，環境衞生惡劣。

「我哋呢邊幾年前入伙，住住下就發現由朝到晚樓下都好嘈。原來對面個工廠區無論早晚都泊晒貨車上落貨，倒車又有嘟嘟聲、唧車聲、工人掟貨聲，真係試過瞓着都嚇醒！」劉先生指元州邨五期與福榮街只一街之隔，貨車長期違泊兼上落貨令街坊飽受滋擾，低層居民更是居無寧日。

劉又指上址一帶馬路儼如免費停車場，車輛上落貨後又會遺下大量雜物，「搞到好似亂葬崗咁，加上呢度冇禁區時間，差人係有嚟抄牌，但都冇用，最慘係啲車落完貨就成地垃圾，又霸晒成條行人路！」劉要求政府部門設法改善，還市民一個正常的居住環境。

記者曾於不同時段到場了解，早上及午夜均發現有人於馬路上落貨，並間歇性發出巨響，上址又最少2條行車線長期被車輛霸佔，行人路上亦積聚大量雜物，當中包括卡板、竹棚及發泡膠箱，遇上天雨衞生情況更為惡劣。

警方發言人證實，過去1年曾接獲16宗涉及上址有車輛違泊及兩宗噪音滋擾的投訴，期間發出逾一百張定額罰款通知書。

運輸署發言人表示，留意到該處車流量有所增加，車輛如在路旁停車上落貨容易導致交通擠塞，故早前已安排增設上午7時至下午12時的不准停車限制區，預計工程可於今年第3季完成。

食環署發言人則指，過去1年共接獲28宗有關上址行人路有雜物的投訴，惟派員巡查時未見有雜物妨礙街道清掃，但期間發現上址有鼠蹤，遂安排承辦商在附近一帶加強控鼠工作。

一直有跟進事件的深水埗區議會交通事務委員會委員覃德誠表示，上址違泊問題存在已久，數年前已曾向運輸署反映新屋邨入伙後居民會受滋擾，批評當局未有及時制訂解決方案，「（元州邨）五期呢度原本都係工廠區，入咗伙啲貨車唔分日夜咁過貨對居民真係好滋擾，運輸署上年應承過話會再做地區諮詢，但成七個月都未見到結果。」覃又指，傳統工廈內不設車場，廠家被迫在街上過貨應作體諒，要求當局盡快完成設立分段禁區時間，在維持廠戶生存空間與居民生活安寧之間取得平衡。