香港打卡︰貓狗店員　爭做大埔明星

繼尖東忌廉哥後，最新寵物明星登場！近日有網民舉辦最受歡迎大埔店寵物店員比賽，由3位大埔墟店舖的鎮店之寶比併，包括「藥房七爺」、「報紙檔啫喱」及「菜檔咪咪」，牠們憑天使臉孔、魔鬼身材，成為店舖代言人，吸引大批街坊朝聖。比賽發帖1日，即吸引逾7百個Like，誰是美貌與智慧並重的冠軍得主呢？

記者日前率先採訪3位候選「佳麗」，1號佳麗是藥房貓貓七爺，芳齡10歲，「食完就瞓，瞓醒就食」可謂是牠的人生座右銘。「佢最鍾意就係瞓覺，仲要次次都係啲貨上面瞓！」被稱為七爺經理人的藥房職員耀仔介紹，「佢咩都鍾意食，之前啲街坊成日餵佢食嘢，食到佢暴肥。」可愛的貓樣，加上「任摸唔嬲」的親民性格，七爺早成為街坊寵兒，惟粉絲太過熱情，為七爺的健康着想，藥房早前貼上「請勿餵貓」標示，希望七爺盡快修身成功！

「佢開始享福，而且係我嘅寶貝，希望大家投佢1票啦！」2號候選佳麗菜檔貓貓咪咪，其主人珍珍積極拉票，她指咪咪已年屆16歲高齡，作為一隻殿堂級寵物，為人有點「大牌」，記者須待牠午睡後才可採訪，「佢日日都要瞓晏覺，而且一定要我哋餵佢先肯飲水。」珍珍指咪咪於菜檔工作10多年，現在已經退休，不需再捉老鼠，主要職責就是打躉吸客。

最後1位3號候選人是報紙檔狗狗啫喱，惟啫喱於採訪當日太眼瞓，最終未能親自拉票，不過啫喱早在區內聲名大噪，必殺技是看檔時將前腿放在枱上，半挨半企的趴着，迷人的電眼一眼關七，吸引不少人專程來一睹牠的風采，多年來都是報紙檔生招牌。

「大埔店寵物，誰最受歡迎 ？」比賽戰況激烈，有網民總括「1號夠Social，2號夠溫婉，3號夠性格」，搞到人人患選擇困難症。對於誰是最受歡迎的大埔明星，也許就如另1網民說：「全部都係，不分勝負！」