水泉澳邨交通交匯處遲落成　居民唔夠車搭

沙田水泉澳邨於今年4月下旬陸續開始入伙，居民原以為終覓得安樂窩，未料邨內交通配套不足，而屋邨卻位處山上，居民出入均有困難。

「我行上嚟都要15分鐘，女士就起碼要行20分鐘到，但夜晚我都唔會畀個女一個人行上嚟，惟有我親自落去接佢。」王先生一家剛入伙沙田水泉澳邨，直指屋邨單位現已相繼入伙，但交通配套卻不足，未能滿足居民需求，「呢條邨4月就入伙，3個月嚟都係得1架288號巴士去沙田，但11點就尾班，班次又唔密，個女放工已經冇車返屋企，啱啱先有多架小巴，但分分鐘等成25分鐘1班，仲要10點半就尾班車！條邨愈嚟愈多人，得咁少車邊夠？」

而即將入伙水泉澳邨的鄭小姐亦認為屋邨交通配套不足，加上未有商場等其他配套，即使購買日用品及食物亦需乘車外出，故要求巴士公司加密班次，「我上嚟嗰陣咁啱有車嚟都唔係等咗好耐，不過之前都有20幾人等緊，都冇咩位坐，要抱住小朋友企。」

「原本公共個運輸交匯處係應該4月尾啟用，即係同條邨第1期入伙同期，但到依家都未搞掂，居民係就係入咗伙，但出入配套都唔夠，好難怪有啲居民講笑咁話好似畀政府呃咗入嚟咁！」當區區議員丘文俊表示，水泉澳邨現時不論衣食住行之配套仍屬「百無」，每日均接獲居民有交通配套不足之反映，要求房署加強興建設施之速度，同時與運輸署緊密合作，確保交通配套合乎需求。

房署發言人表示，水泉澳邨由今年4月開始辦理入伙手續，承認現時邨內不少工程仍在進行中，臨時辦事處在辦理入伙手續時已向租戶簡介邨內當時的交通配套及其他設施等情況，以便租戶自行決定是否接受單位編配，而公共運輸交匯處工程已進入驗收階段，期望交匯處能於7月底開放。

運輸署發言人則指，為配合水泉澳邨入伙，已安排九巴288號線來往沙田市中心，於6月底起安排專線小巴813及813A供市民來往石門及沙田醫院，稍後仍會按入伙進度及乘客需求陸續增設巴士及小巴服務。發言人又承認，已留意到288號巴士乘客人數逐斷上升，而九巴亦將在7月內加強服務，並延長服務時間。