白田邨社服機構天花滲水　房署維修拖 2月

位於石硤尾白田邨一間社會服務機構月前受滲水影響，導致天花批盪剝落，有關機構要求房署處理滲水問題，卻遭職員以不同理由推搪，且一直未有交代滲水原因，拖延2個月後始安排防漏工程。

「打畀房署，佢有同事嚟睇一睇就話依家落緊雨，做唔到啲咩測試，要等好天先再可以檢查邊度漏水定咩情況。到好天佢哋係嚟睇過，但就話要等落雨先再檢查邊啲地方滲水囉！」為聽障人士提供服務的社會服務機構「龍耳」項目統籌陳啟明指出，今年4月初發現中心天花出現「跌灰」情況，隨即聯絡房署要求跟進及維修，職員每次僅內進「睇一睇」，卻一直未有交代跟進情況。

由於中心於暑假期間有活動舉行，陳啟明擔心滲水情況惡化會威脅會員及職員安全，「唔知佢幾時再突然冧嘢落嚟，咁啱去廁所一定要經過嗰個位，驚會整親啲會員同職員！呢度又有部影印機，跌落嚟整壞咗或者有咩危險，係咪房署負責番先！」

陳指前後拖延2個月，直至6月中房署職員突然又指即將進行防漏工程，「有房署啲人入嚟突然同我哋講，話會直接喺上面個位做防漏工程，但又冇話搵到係咩原因，又冇解釋喺咪滲水，真係好混亂。」

「房署有自己嘅屋宇裝備維修隊伍，有足夠技術去處理滲水問題，依家咁多理由諸多推搪，簡直係笑話！」深水埗區議會房屋事務委員會委員兼當區區議員甄啟榮批評房署跟進不力，面對投訴人多次投訴及查詢，仍未適當處理及徹底解決問題，大有失職之嫌。甄認為房署應檢討有關屋邨滲水及維修問題的處理手法，更要加強監察屋邨辦事處及工程承辦商，避免類似情況再次發生。

房屋署發言人指出，接獲滲水舉報及鎖定懷疑滲水地點後，於5月曾派職員聯同工程組及工程承辦商到滲漏單位進行測試，確定滲水源頭為單位對上天井位置，需重新舗設防水層。惟工程進度受較早前不穩定天氣影響，並於6月中向該機構負責人講解滲漏原因及防漏工程的安排情況。防漏工程亦已於6月20日完成，室內天花批盪及油漆工程亦於同月29日竣工。發言人表示，已提醒職員及工程承辦商須加強與租戶溝通，以免誤會。