網民熱話：叫豬柳包餐要淨包　得層皮勁無奈

港人出街食飯，最愛將食物的分量和口味「個人化」，要求多菜、多肉、加底、少甜、少奶、走冰……等等等等。不過即使食肆跟足要求，原來亦未必萬無一失，更隨時鬧出「超常識」的大笑話。有網民近日便分享到快餐店M記買套餐要求「淨包」走薯條汽水，最終真的只獲兩塊「麵包皮」的慘痛經歷，惹笑之餘，網友亦紛紛獻計，以求日後不必重嘗苦果。

網民Chun Wai Lok近日在facebook群組「西環變幻時」分享慘痛買包經歷，透露其父要求工人到快餐店M記購買1個豬柳蛋漢堡，工人於是便向店員以英語表示「10號餐個(嗰)個包，唔要薯條唔要汽水」，即是「單買個包」即可，豈料工人將食物帶返家中後，貼主卻發現原來店員果然跟足要求，更「貼心」地在單據上列明該包「不要芝士、牛油、蛋、豬柳」，變相令貼主最後只得到兩塊麵包皮。貼主見狀無奈說：「會唔會俾(畀)10蚊買呢兩塊包皮」，若真的只要麵包皮，「我去超市買都有」，幸好最後M記「都肯換番有餡既(嘅)」。

網友睇見此「驚天大誤會」，自然人人笑到唔停口，有人追問貼主當時工人「點落order(要求)」，「係咪話only bread(只要麵包)」，亦有網友覺得貼主工人落單落得奇怪，「咁點解唔講一個豬柳蛋漢堡？要講10號餐、唔要汽水、唔要薯條」，難免引起誤會。另有網民充當網絡偵探，質疑其實是收銀員感到貼主工人要求多，才「專登玩你」，故意砌出一個不合常理的包給貼主。至於如何避免悲劇重演，有網友便教精貼主，日後應該「寫紙仔」給工人購物，以免再因溝通出錯添煩添亂。

網民有話說：

鄧永鴻：我估佢係用英文話淨係要包，個收銀唔識聽以為全走

Johnson Tsay：要乾炒牛河走牛肉，芽菜同河粉.....

Drew Tsui：寫張紙仔比(畀)個工人去買咪唔使煩

Kitty Shelley：早講嘛，我要你不要那部分！！

※緊貼網民熱話，掌握最熱話題，請關注 on.cc 東網fb：