政Whats噏：肉緊加薪3%　高級醫生發功

打工仔每年等加人工都份外緊張，連專業人士之一嘅醫生都唔例外，適逢一年一度公務員加薪，今年一批高級公務員獲額外加薪3%，追溯生效日期至去年10月1日，而眼見醫管局起初冇表態會否跟隨額外加薪，香港公共醫療醫生協會(PDA)代表一批高級醫生發功，由PDA會長陳沛然化名「陳配鹽」，參照女歌手薛凱琪早年熱爆嘅歌曲《奇洛李維斯回信》二次創作，稱呼食物及衞生局局長高永文為「K先生」，希望對方好似歌詞咁用18秒鐘睇睇佢哋封信，高級醫生為咗可以額外加薪真係去得好盡！

公務員事務局每6年進行一次薪酬水平調查，確定公務員薪酬係咪同私營機構薪酬大致相若，最新一次為2013年薪酬水平調查，特首會同行政會議今年2月拍板，決定一批月薪9萬多元或以上嘅高級公務員獲額外加薪3%，立法會財務委員會亦於暑假休會前通過，基於今次額外加薪可以追溯至去年10月，一批高級醫生見到醫管局一直冇聲氣係咪跟隨，都好鬼肉緊諗計仔，一來希望引起業界關注發聲，二來亦希望醫管局正式表態等大家安心。

其中為此發功並走得最前嘅係PDA，一早喺自己網頁搞咗個名為「3%」既專頁，向大家跟進並匯報最新進展，其中上周一更有一篇內含醫學術語嘅「新聞」報道，由陳沛然化名為「陳配鹽報道」，一時又引述話「3%」於醫生手機爆發異於尋常，「出現於醫生群組爆發及有效地人傳人」，其後又稱「3%」嘅應變級別，由戒備提升至嚴重。

最引人入勝嘅部分係參照《奇洛李維斯回信》呢首歌曲二次創作，提到工會早於今年3月起，3次發出公開信予各高層包括K先生關注事件，表明「K先生可否阻你18秒鐘看看信」，如果認同機制需要跟隨可以有回信等，認真係花臣多多，講到底都係想醫管局喺此事有正面回覆。

據聞話口未完就有新進展，醫管局回覆話就公務員薪酬水平調查報告，會審慎考慮對醫管局僱員既薪酬做類似調整，仲計劃下月中將建議提交人力資源委員會討論。話時話，有咗討論額外加薪嘅會議時間表係成功嘅一半，但最緊要都係付諸落實，PDA於開會前有否新一波行動爭取額外加薪，答案似乎不言而喻嘞！

※更多政經猛料、秘聞，請關注 on.cc 東網fb：

http://on.fb.me/1Tp8ICL