葵涌興芳路巴士站違泊猖獗　乘客上落搵命博

「明明係小巴站，點知就變咗泊車位，成日都有貨車當正嗰度係免費停車場！」居於葵芳的張先生表示，興芳路遊樂場鄰近林士德體育館對出設有專線小巴站，路線包括有87K、313及407等，方便區內居民前往荃灣、葵盛及青衣等地方。但張發現，每逢中午至傍晚，上址小巴站經常被車輛佔用作停泊，「日日都係咁，多數都係貨車，好似無王管咁！」

張指違泊車輛嚴重阻礙小巴上落客，「啲車泊咗喺小巴站，等車啲人又睇唔到架小巴，小巴司機又埋唔到站！」張曾目睹有小巴受阻未能「埋站」，被迫在馬路中心讓乘客上落，「車來車往，就咁喺路中心上落真係好危險，萬一發生意外就大件事！」張坦言不滿有關違泊情況長期沒有改善，影響市民及其他道路使用者安全。

運輸署發言人表示，該署一向注重道路安全。目前，駕駛人士已可利用鄰近葵芳邨的多層停車場停泊車輛，為方便專線小巴靠近路旁上落乘客，該署會安排拆除小部分路旁欄杆，以便將林士德體育館對開的專線小巴站往前移至現有的停車限制區，減低對乘客及其他道路使用者的影響。該署亦會就違泊問題聯絡警方，讓警方加強執法，改善有關情況。

警方發言人證實，去年8月至今年7月警方共接獲65宗有關上址違例泊車及車輛阻塞的投訴，並向違例車輛共發出132張定額罰款告票。警方會繼續密切留意上址情況，並會派員加強巡邏，如發現有違例泊車，定必果斷執法。

「拆咗個欄杆都解決唔到違泊問題，真係治標不治本！」葵青區議會交通及運輸委員會委員黃潤達表示，車輛佔用小巴站停泊阻礙小巴司機視線，隨時釀成交通意外，「啲小巴可能駛到個站好近先至見到有冇人等緊車，搞到喺路中心急停上客，後面啲車如果跟貼咗，就會好危險！」黃認為違泊問題嚴重，明顯反映區內泊車位不足，長遠而言，運輸署應正視區內泊車位不足的問題，增加泊車位，以作改善。