政Whats噏：黃容根區選遇泛民「艇仔」挑戰

區議會選舉將於11月舉行，各政黨都磨拳擦掌，積極備戰，其中新民主同盟就計劃派出中大社工碩士周炫瑋，挑戰已經連任多屆的大埔區議員黃容根(根叔)。不過，根叔身為前漁農界立法會議員，而且在地區紥根多年，正所謂「猛虎不及地頭蟲」，要打敗他並不容易。對於被後生仔「挑機」，根叔腦轉數奇高，寸爆對方對該區一無所知，基本資料都未弄清楚。

今次越級挑戰的周炫瑋，讀大學時是划艇隊隊員，他稱如果同根叔鬥划艇未必會輸，還希望憑着自己的划艇底子，可以同街坊多一些話題；而以前做運動員的艱苦訓練，亦有助他現時每朝落區擺街站都不怕辛苦。對於有後生仔挑戰，根叔就氣定神閒話：「周先生係唔係搞錯咗呀？我嗰區得好少水上人喎，要打入水上人社區應該打隔離區就真！呢度有咩都唔知，即係對地區唔認識啦！」

談到自己有何優勝之處，根叔話擔任廿幾年區議員，街坊有眼見，「我唔會車大炮、講大話，只會做實務！街坊叫我唔好走，我就唔會走！」言談間完全感受到根叔充滿戰意和信心，看來艇仔要擊倒大船不容易。